Наргиз Гюлечова
Гьербе йигъан, Дагъустандин РИА-йин конференцйир гъахьру залиъ Росреестрин Дагъустандин управлениейин кIулиъ айирин заместитель Вячеслав Нитенкойихъди ва «Роскадастр» ППК-йин директорин заместитель Вадим Аьлибеговдихъди жиларин кадастровый месэлйирин гьякьнаан вуйи пресс-конференция кIули гъубшну.
Конференция ачмиш апIури, В. Нитенкойи мялум гъапIганси, гьаму йисан жиларин кадастрин ляхнар 35 муниципалитетарин 172 кадастровый кварталариъ кIули гъягъюра. Асас вуди му ляхнар жилин участокарин сяргьятар улупуз кIури гъахурайидар ву. Гьацира паркарин, рягьятвал гъадабгъру жара йишварин ва гъулан мяишатдин мяна айи жиларин сяргьятарра тяйин апIиди. Кадастровый ляхнар духну ккудукIбалан кьяляхъ, душв ишлетмиш апIбан бадали, жиларин пландин карта гьязур апIиди.
Конференцияйиъ иштирак шулайи Вадим Аьлибеговдиз къанундиинди официально дибикIну къайд апIуз даршулайи участокарин ва гьадушв’ин дивнайи гьацира яшамиш шулайи хуларин гьякьнаан вуйи суаларра тувунза.
Йиз суалназ жаваб туври Вячеслав Нитенкойи мялум гъапIганси, эгер 15 йислантIан артухъ вахтна думу участок ишлетмиш апIури, дидхъанди налог туври гъахьнуш, хъа тялукь органарин вакилар думу участокдиз лазим вуйи документар гьязур апIуз инкар шулаш, эйсийихьан суддиз илтIикIну, чан участок жвуван ликрихъ хъибтIуз шулу.
Хъа Табасаран райондин Гюгьрягъ гъулаъ гъулан мяишатдин мяна айи жилариин дивнайи хулар чпин ликрихъ хъитIуз даршулайивалин гьякьнаан туву суалназ жаваб вуди дугъу гьамци гъапну: «Ихь республикайиъ гъи му месэла читинди дийибгъна. 1990-пи йисари республикайин саки вари гъулар гизаф аьхю гъахьну. Гьаддиз цIийина айи сяргьятар али йишвариин илимдар.
Милли проектарин программайиъ, Урусатдин Президент В. Путиндин табшуругъниинди, месэла гъагъиди айи жилар гюзчиваликкна гъадагъна. Эвелиан программа уьмриз кечирмиш апIруган, гьюкуматдин реестриъ айидар 10 гъулан сяргьятартIан дайи. Йисна гьацIан вахтнан арайиъ ляхин гъабхбиинди, гьамусяаьт дурарин кьадар 700-тIан артухъ дубхьна. Хайлин ляхин тамам дапIна.
Гьаддиз, гьадму гъулаъра генеральный план гьязур дапIнаш дилигну ккунду. Фицики гьарсаб гъулаъ, шагьриъ гъулан мяишатдин мяна айи жиларинна гъулан сяргьятар улупнайи генплан ади хьуб чарасуз ву. Эгер думу гъулаъ генплан гьязурди адарш, му читин месэла гьял дарапIди гъубзди. Гьаддиз, гъуландариз кюмек апIбан ва му месэлайин гьякьнаан артухъди мялуматар аьгъю апIбан балали, лазим вуйи документарра хьади учухьна гъюб ккун апIураза», – гъапну Вячеслав Нитенкойи.
