Гьаму йигъари Москва шагьриъ яшамиш шулайи, Табасаран райондин Гюгьрягъ гъул’ан вуйи ихь ватанагьли Аслан Гьяжиагъаев Кьибла Америкайин Аргентинайиъ ерлешмиш дубхьнайи Аконкагуа дагъдин кIакIназ удучIвну. Думу дагълар Америкайин континентарин терефнаъ варитIан ягълидар ва альпинистариз гизаф хатIа айидарси гьисаб апIура.
Аслан Хуршидовичди табигъ гъапIу дагъларикан му дагъ сабпиб дар. Учу, улихьна йисари дугъу Килиманджаро, Косцюшко, Эльбрус дагълар мютIюгъ гъапIиганра, газатдиъ мялуматар тувнийча.
Учв дестейиъди дагъдин канчIлихъ дивнайи лагериз гъурукьиган, думу учухъди телефондиан аьлакьайиз удучIвну.
«Аконкагуа дагъ чаина ккудучIвуз лап читинуб ва гъагъиб ву. Учу дидин кIакIариз ккудучIвайиз кьюб гьяфта гъабхьну. Ич дестейиъ 10 кас туристар-альпинистар ва кьюр кас рякъ улупрудар а. Дестейиъ айидар саки вари Урусатдин ватандашар ва сар Австралияйиан вуйи ирланд миллетдин вакил ву. Вари альпинистар бегьем гьязур духьнайи дирбаш баяр ву. Дагъдин уьзриз дилигди, варидарихьан кIакIариз ккудучIвуз гъабхьну. Аконкагуайиъ ягълишан 6962 метр ву, ва узу ккудучIву дагъларикан варитIан гъагъибра гьаму аьхиримжи дагъ ву. Узуз вари дюн’яйин «7 дагъ» проектдиъ иштирак хьуз ккундузуз. Вари дюн’яйин гьарсаб континентдиъ чан варитIан ягъли дагъ а.
Ургубдикан 4 дагъдиина ккудучIвунза. Гизаф машгьур альпинистарихъди таниш гъахьунза, дуствалин аьлакьйир уьрхюрача, сар-сариз зенгар апIури, ич хъуркьуваларикан, гележегдин планарикан ктибтурача. Йиз ужур дуст, альпинист Вячеслав Лукашев, гьарганси, гьаму ражарира узухъди сатIиди гьаму дагъдиина за гъахьну.
Учву Аконкагуа дагъдихъдира сацIибди таниш апIуз ккундузуз. Узу зиихъ гъапиганси, му дагъдиина альпинистар асас вуди Килиманджаро дагъдин кьяляхъ гъягъюри шулу. Аконкагуа дагъ, чаина ккудучIвуз гъагъиб ву.
Дидин кIакIариз, яна саки 7 километр манзил ади жилгъа гъябгъюра. Амма му кьюбиб дагъларин арайиъ аьхю фаркьвалар а. Аконкагуа КилиманджаротIан саб километр ягъалди ву, ва мушваъ гьава бицIи вахтнан арайиъ дигиш шулу. Дагъдин кIакIназ удучIвайиз асккан гьисаб кьюб гьяфта гъябгъюру. Йишвар, икибаштIан, палаткйириъ, лагерариъ адаунча. Аконкагуа дагъ беден бегьем гьязур дубхьнадарш, дагъдин уьзрихьан жвув уьрхюз шулдарш, мютIюгъ апIуз шулдар. Му альпинистариз варитIан гъагъи, «мютIюгъ апIбаз гъаршувал улупру» дагъларикан саб ву. Гьамушв’инра, Мак-Кинли дагъдиинси, гизаф альпинистар гъийихну.
Вари жара дагълариинаси, узу гьаму ражарира узухьди Урусатдин ва Дагъустандин пайдгъар, «Анжи» футболин командайин туп хьади гъафунза. Вари йиз ватандашариз дюн’яйин варитIан ягъал дагъдилан саламар хътаураза», – гъапнийи Аслан Хуршидовичди.
Увура кIваъ айи мурадарихъ хъуркьри ва наан ашра Аллагьди уьрхри, Аслан Хуршидович. Гъит, уву гъапиганси, гележегдиъ вари дюн’яйин варитIан аьхю ургуб дагъ уву мютIюгъ гъапIу йигъкан ухьу ихь халкьдиз хабар тувруганси ибши.
