Аьхиримжи вахтари табаcаран баяри спортдин жюрбежюр жюрйириан аьхю хъуркьувалар улупура. Магьа гъубшу гьяфтайиъ ихь ватанагьлийир швнуб-саб турнирин гъалибчйир гъахьну.

Январин 18-19-пи йигъари Баку шагъриъ YFC тешкилатди кIули гъуху ММА-йиан вуйи кчIихбариъ 21 йис’ина яшнаъ айи ва 77 кило гъагъишин айи спортсменарин арайиъ чемпионвалин чIул гъадагъбан бадали, ТинитI гъулан агьали Аьгьмед Рамазанов Ирандиан вуйи спортсмендихъди талитназ удучIвну. Гьеле сабпи раунддиъ ихь ватанагьлийи думу кIанакк ккитнийи, хъа кьюбпи дакьикьайин аьхириъ гъурдар йивну, иранлу нокаутдиз гьаънийи. Натижайиъ Аьгьмед Рамазановди YFC тешкилатдин чемпионвалин чlул гъадабгъну. Дугъахъди интервью учу гъубшу нумрайин 4-пи машнаъ тувнийча.

Сарсана табасаран бай, Мягьячгъалайиъ яшамиш шулайи, Табасаран райондин Заан Гюгьрягъ гъул’ан вуйи Аллагьверди Аьшурбегов улихьнаси Каспийск шагьриъ кIули гъубшу джиу-джитсуйиан талитариъ 77 кило гъагъ айи спортсменарин арайиъ Дагъустандин чемпион гъахьну. Гьамусяаьт думу джиу-джитсуйиан 26-пи январиъ Москва шагьриъ кIули гъябгъру Урусатдин чемпионатдиз гьязур шула.

Къайд дапIну ккундуки, Аллагьверди джиу-джиутсуйиан ихь сарсана чемпион Марат Гьяжикъурбановдихъди сабси Рамис Ягь’яевдин тренерваликкди спортдиин машгъул духьнайир ву.