РФ-дин Президент Владимир Путинди, чан Федералин Собраниейихьна вуйи Посланиейиъ агьалйирин яшайиш гъулай, гъуларна шагьрар артмиш апIбан жигьатнаан гьял дапIну ккуни саб жерге месэлйирихъди сабси, жигьиларин сиясатдизра фикир тувна. Йишвариин арайиз дуфнайи аьгьвалатнакан гъапиш, мумкинвалариз лигну, ляхин гъабхура, вушра думу уьлчмйир гьюлизди ахьрайи штун литIнарик гьисаб ву.
– Республикайиъ жигьиларин месэлйир гьял апIбан гьякьнаан гъахурайи серенжемар фикирназ гъадагъну, Хив райондиъра саб жерге серенжемар гъахурача, – кIура сюгьбатнан эвелиъ Хив райондин культурайин, спортдин, жигьиларин политикайин ва туризмдин отделин кIулин пишекар Анзор Аьлиризаевди.
– Жигьилар ватанпервервалин, рюгьлувалинна эдеблувалин гьиссариккди тербияламиш апIури, райондиъ артмиш шулайи насларин арайиъ спорт артмиш апIбаз эгьемият тувра. Гьаци, саки гьар йисан ва жюрбежюр машкврарин йигъариз тялукь вуди, жигьиларин заан иштирак’валиинди спортдин талитар гъахура.
Хъа чпин удукьувалар ахтармиш дапIну, мюгькам апIбаз йишвариин жигьилариз хайлин шартIарра яратмиш дапIна. Гьамусяаьт райондин асас пай гъулариъ воркаут майднар, спортзалар ляхник ка.
Пуз ккундузузки, ра-йондин дережайиъди кIули гъахурайи жюрбежюр акц-йир асас вуди волонтерарин иштирак’валиинди гъахурача. Гьаци, 2019-пи йисан райондин сяргьятариин дурарин иштирак’валиинди «Учу гьарган багахь хьача», «Зарница», «Уж’вал апIуз гьялак йихь!», «Марцци юкIв – марцци вилаят», «Папрус гатIабхь», «Уж’валнан гьяфта», «Гъалибчйирин наслар», «Фикриъ айиз! Дамагъ апIураза!», «Гъалибвалин сирень», «Аьжалсуз полк», «Урусатдин бицIидар», «Ккун-дузуз уву, Урусат!» ва хайлин жара серенжемар духнача.
Дугъриданра, жигьилар ватанпересвалин лишнариккди тербияламиш апIбан ва спортдин артмиш’валин рякъ’ан Хив райондиъ кьабул апIурайи уьлчмйирикан сикин дарди улхуз шулу. Тялукь саягъниинди гъабхурайи ляхни живанар рюгьлувалин, эдеблувалин гьиссариккди тербияламиш апIбаъ аьхю роль уйнамиш апIура. Деврин учIру месэлйирин дережайиз илтIикIнайи терроризмдинна наркоманияйин къурхулувалин гьякьнаан мектебарин мялимари, къанунар уьрхбан ва живанаринна хизанарин месэлйириз лигру гъуллугъчйири, диндин вакилари ва учу сигъ аьлакьайиъди кми-кмиди гъаврикк ккаъбан ляхин гъабхурача. Серенжемар гъахура, вушра гьякьикьатдиъ арайиз гъюрайи саб жерге дюшюшар фикирназ гъадагъиш, гьелелиг архаинвализра мюгьлет тувуз шулдар. Фицики улихьнаси ухьу вари ихь республикайин шагьрариъра, саки ккергъбан классариъ айи живанарин жергйириъра кмиди, наркотик кайи шей’ар тарагъбан шагьидар гъахьунхьа. Тялукь гьяракатариз мумкинвал тувну ккундар. Сагъу наслар мюгькам уьлкейин бина ву. Ухьу гьарсари му жигьатнаан гъабхурайи ляхник пай кивуб чарасуз лазим ву, – аьлава гъапIну дугъу.
