Урусатдин Дагъустан Республикайиъ айи МВД-йин Табасаран райондин ОМВД-йин участокдин вари ихтиярар айи аьхюну вакил, полицияйин майор Гьясан Мевлудинович МутIалибов 2016-пи йисан мартдин 30-пи йигъан чан гъуллугънан вазифйир тамам апIурайи вахтна, теракт хьуз гъид-ритди, гъакIну.
Багарихьди РД-йин Главайин грантдин ва РД-йин милли политикайин ва диндин ляхнариз лигру Министерствойин дакьатарихъ Гьясан МутIалибовдин гьунарназ бахш дапIнайи, «Уьмур уьбхюри гъакIну» ччвур али китаб чапдиан адабгъиди.
КIваина хурача, пашман дюшюш Табасаран райондин Сиртич гъулан багахь гъабхьнийи. Дежурство гъабхурайи Гьясан МутIалибовди ва дугъан гъарашугъ Тарлан Аьгьмедовди рякъди гъюрайи машин дебккуз ишара гъапIнийи – МутIалибовдиз машиндиъ айи пассажирарикан сарнур, террориствалин ляхин гъабхбаз лигну, къанун уьбхру органари агурайир вуйиб аьгъю гъабхьнийи. Амма шофери, полицияйин гъуллугъчйирин тIалабназ иб тутрувди, аьксина машин хъана зарбди хъапIуз хъюгънийи. Гь.МутIалибов ва Т.Аьгьмедов дурарихъ чпин гъуллугънан машиндиъди хъергнийи ва, кьюб километр манзилналан хъуркьну, террористар айи машиндиз дурари рякъ гьадабтIнийи. Полицияйин гъуллугъчйирихьан гьергуз даршлувалин гъавриъ гъахьи бандитари, чпи машиндиъди гъабхурайи тIубкIру сяняаьт гьяракатнаъ ипнийи. Натижайиъ МутIалибов гьадму йишв’ин гъакIнийи, хъа Аьгьмедовдиз гъагъи зийнар гъахьнийи. Гьамци, террористари машкврин йигъари тамам апIуз планламиш дапIнайи теракт кIулиз адабгъуз гъидритди, 34 йисаъ айи полицияйин майор гъакIнийи. Дугъан хулаъ хпир ва шубар велед гъузнийи.
Гьясан МутIалибовдиз йикIбан кьяляхъ Кьягьял-валин орден тувбан къарар адабгънийи. РД-йин айтIан ляхнарин министр Аьбдурашид Мягьямедовди орден полицияйин майор Гьясан МутIалибовдин адаш Мевлудин МутIалибовдин хилиз тувнийи.
Чапдиан адабгъуз ккайи китабдин автор Кафари Кавказдиъ исламдин ахтармишар гъахру Центрин директор Руслан Гереевди гъапиганси, Гьясан МутIалибовдин гьунар – жигьилариз дирбаш’валин ва ватанпервервалин чешне ву. Полицияйин гъуллугъчийин уьмрикан ва гьунарнакан ктибтурайи китаб жигьилариз ватанпервервалин ва рюгьнанна намуслувалин тербия тувбан ляхин гъабхурайи образованиейин цирклин гъуллугъчйириз вузариъ, жигьиларин тешкилатариъ дирбаш’валикан дарсар тувру методикайин саб дакьат хьибди.
