Январин 24-пи йигъан Мягьячгъалайиъ «Дуствалин Хулаъ» Ленинград фашистарин чапхунчйирихьан азад дапIну 76 йис тамам хьувалихъди аьлакьалу серенжем кIули гъубшну. Серенжемдиъ РД-йин муфтиятдин председатель Шамил Аьлиханов, Дагъустан Республикайин милли политикайин ва диндин ляхнарин министр Энрик Муслимов, жямяаьтлугъ вакилар, жигьилар иштирак гъахьнийи.

 

«Ватандин Аьхю дявдиъ жюрбежюр миллетарин вакилар, гьар жюрейин динар хъаърайи инсанар, чпин ватан, жвуван хал уьбхюри, дявдин женгариъ гъахьну. Дурариз гъалиб хьуз сабвали кюмек гъапIну!» – гъапну чан улхбаъ Шамил Аьлихановди.

 

Энрик Муслимовди уч духьнайидар серенжемдин гьюрматлу хяларихъди – Ирина ва Галина Сухомлиноварихъди, Марина Бессаловайихъди таниш гъапIнийи. Думу касар дявдин йисари Ленинграддиъ яшамиш шули гъахьну. Энрик Муслимовди дишагьлийирин кIваълан дурубшру гьунарназ, ухьуз гъи ислягь ругариин яшамиш хьуз мумкинвал тувувализ чухсагъул мялум гъапIнийи. Чан улхбаъ дугъу къайд гъапIганси, январин 27-пи йигъ ихь уьлкейин ватанагьлийириз важиблу йигъ ву: 872 йигъан Ленинград шагьур фашистарин чапхунчйири кьялаъ тIапIну гъабхьну. Тарихдин аьлимарин улупбариинди, гьаму гъагъи йигъари 700 агъзурилан миллионна гьацIкьан инсанар гъийихну. Думу кьадарнакан душмандин бомбариан ва гюллйириан 3% инсанартIан гъийихундар, имбудар – гаш’валиан гъийихнийи. Ленинград душмнарихьан азад апIбан дявдин женг Дюн’яйин кьюбпи дявдин тарихдиъ варитIан ярхиб ва гизаф инсанар гъийихуб гъабхьну. 1941-пи йисан чвлин вахтнахъан мина Советарин кьушмари, шагьур душмандихьан азад апIбан бадали, хьуб ражари жюрбежюр гьяракатар кIули гъухну, амма 1943-пи йисан январин вазлиъ гъубху «Искра» кIуру операциятIан ягъурлуб гъабхьундайи. Советарин армияйи сад йислан – 1944-пи йисан 27-пи январиъ шагьур душмандихьан кIан’ан кIулиз азад гъапIнийи.

 

РД-йин милли политикайин ва диндин ляхнарин Министерствойи, Ватандин Аьхю дявдиъ гъалибвал гъадабгъну 75 йис тамам хьувалихъди алакьалу вуди, гьаму йисан гизаф серенжемар гъахувал планламиш дапIна.