Табасаран райондин жигьилариз февраль спортдин терефнаан маракьлу ваз ву. Му вазли райондиъ спортдин жюрбежюр жюрйириан сабпи йишв бадали талитар гъахьну. Спортдин серенжемар асас вуди Ватан уьбхрурин Йигъахъди – 23-пи февралихъди аьлакьалу вуйи. Гьаци, думу йигъаз бахш вуди волейболиан, футболиан, юкьяр дисбаан талитар кIули гъушну.

Хючнаарин сабпи нумрайин мектебдин спортзалиъ юкьяр дисбаан кIули гъушу талитариъ, Хючна, Ккурихъ, ТIаттил, Ярса, ХустIил, ТIивак, Дарвагъ, Мягьрягъ гъуларин мектебариан 150-тIан артухъ спортсмен иштирак гъахьну. Натижайиъ сабпи йишв Ккурихъ (мялим-тренер Мурад Аьзизов), кьюбпи йишв ТIивак (мялим-тренер Аьбдулманаф Аьбдулгьялимов) гъуларин кьялан мектебариъ урхурайидарин командйири гъазанмиш гъапIну. Шубубпи йишв Хючнаарин сабпи нумрайин (мялим-тренер Закир Гюлов) ва ХустIларин кьялан мектебариъ урхурайи спортсменарин командйири чпин арайиъ пай гъапIну.

Волейболиан вуйи талитарин финал Хючнаарин сабпи нумрайин мектебдин спортзалиъ кIули гъубхну. Волейболиан чемпионатдиъ 3-пи нумрайин ДЮСШ-дин живанарин 11 команда иштирак гъахьну. Думу талитар юкьуб турикан ибарат вуйи ва 7-пи ноябриан 23-пи феврализкьан давам гъахьну. Натижайиъ сабпи йишв – Халагъ (мялим-тренер Исрафил Мягьямедов), кьюбпи йишв – АхьитI (мялим-тренер Даниял Гьяжиев) ва шубупи йишв – ФуркIил (мялим-тренер Руслан Ражабов) гъуларин кьялан мектебарин командйири гъазанмиш гъапIну.

Футболиан вуйи талитарра маракьлуди кIули гъушну. Райондин талитариъ чпин зонйириъ сабпи йишвар гъазанмиш гъапIу команд-йир иштирак гъахьнийи. Спортдин думу жюрейиан вуйи райондин талитариъ сабпи йишв Гюгьрягъ, кьюбпи йишв Улзигъ, шубупи йишв Жулжагъ гъуларин команд-йири гъазанмиш гъапIну.

Вари жюрейин талитариъ гъалиб гъахьидар тялукь дережайин кубокарихъди, медаларихъди ва дипломарихъди лишанлу гъапIну.