ТIагьир Ханялиев 1939-пи йисан февралин 23-пи йигъан ДАССР-ин Табасаран райондин ТIюрягъ гъулаъ бабкан гъахьну. Ватандин Аьхю дявдин вахтнан бицIир вуйивализ лигну, дугъу дявдин вари читинвалар бегьемди гьисс гъапIну. Гъулан жара бицIидариси, ТIагьирира, мектебдиъ ужуди урхури, абйир-бабар рази апIуйи.
Дугъан адаш – Гьяжикъаиб Ханялиевич 1941-пи йисхъан мина дявдин женгариъ иштирак гъахьну. Артиллерияйин кьушмарин дахилнаъди женг гъабхурайи вахтна, Сталинград шагьрин багахь дугъан ликриз зиян гъабхьнийи ва 1943-пи йисан думу дявдиан хулаз гьаънийи.
Думугандин бицIи вахтнан уьмриан ТIагьир Гьяжикъаибовичди саб дарс адабгъну: инсан хизанди тербияламиш апIуру ва багахьлуйирин ккунивал сабдихьанра гьюдюхюз шулдар.
Чав швушв хуз ккайиваликан абйир-бабариз хабарсузди мялумат тувруган, ТIагьир Хючнаарин кьялан мектебдин 10-пи классдиъ урхурайи. Абйир-бабар дугъан гафнахъди рази гъахьнийи. Мектебдиъ урхури амиди швушв хувализ лигну, думу мектебдиан утIуккнийи, хъа ужудар аьгъювалар айивализ лигну, имтигьнар тувуз ихтияр тувнийи. Урхувал давам апIуз кьаст дапIну, ТIагьир Ханялиев заочно вуди ДГУ-йин математикайин факультетдик кучIвнийи. Университет ккудубкIбан кьяляхъ, думу математикайин мялимди лихуз хъюгъну. Гизаф йисари думу багъри гъулан мектебдиъ завучди, директорди, 15 йисан ТIюрягъ ва НичIрас гъуларин сельсоветдин председателди гъилихнийи, швнуб-саб ражари гъулан Советдин депутатди ктагънийи.
ТIагьир Гьяжикъаибовичди йицIур бицIир тербияламиш гъапIну ва дурариз билиг тувну. Гьамусяаьт дугъан шубур бай гъулаъ, хъа кьюр бай Москвайиъ яшамиш шула. Сар бали Урусатдин гьюлин ядерный далу вуйи Северодвинск шагьриъ армияйиъ гьюлиин гъуллугъ апIура. Гъи аба 30 худли ва 20 гудли шад апIура.
Пенсияйиз удучIвган, ТIагьир Ханялиевди Огни шагьриз чан бицIидарихьна удучIвну гъягъюз йикьрар гъапIну. Душваъра 4-пи нумрайин мектебдиъ 6 йисан математикайин мялимди, хъасин шагьрин асфальтдин заводдиъ диспетчерди гъилихну. Гьамус ветеранди лайикьлу рягьятвал гъадабгъура, хъа жямяаьтлугъ ляхин дипнадар. Думу агьли касарин Советдин член ву, шагьрин жямяаьтлугъ уьмриъ жанлуди иштирак шула.
ТIюргъярин гъулан Советдин ва мектебдин администрацияйин, мялимарин коллективдин, йиз ва урхурайидарин терефнаан ТIагьир Гьяжикъаибовичдиз бабкан гъахьихъан мина 80 йис тамам хьувал марцци кIваан мубарак апIураза. Гъит, дугъан хизандиъ мюгькам сагъ’вал, кIван шадвал артухъ ибшри.
