Зубайдат Шябанова
Гьаму йигъари Мягьячгъала шагьриъ «Урусат – йиз тарих» тарихи паркдиъ республикайин йитим бицIидариз хулар гъадагъуз пулин сертификатар тувбахъди аьлакьалу серенжем кIули гъубшну. Душваъ Табасаран райондиан вуйи йитим бицIидари чпин сертификат райондин глава Мягьямед Къурбановдин хил’ан гъадабгъну.
Гъябгъюрайи йисан йитимариз сертификатдиинди 2 миллионна 800 агъзур манат пул тувди. Гъубшу йисахь тевган, цци хулар гъадагъуз кюмек вуди жара апIурайи пул 500 агъзур манатдин артухъ ву.
«Жвуван хусуси деъру хал айивал – му ликариин дудуркьну дийигъувал, жвув ватандин бегьем инсанси гьисс апIувал ва ихь гьюкумат гьарсар касдин гъайгъушнаъ айиб кIваин уьбхювал ву», – гъапну Мягьямед Къурбановди, сертификатар гъадагъдар тебрик апIури.
Серенжемдиъ Дагъустандин Правительствойин председатель Аьбдулмуслим Аьдбулмуслимов, РД-йин зегьметнан ва яшайишдин артмиш’валин министрин вазифйир вахтназ вуди тамам апIурайи Мягьямедзагьид Кихасуров, РД-йин ЖКХ-йин, архитектурайин ва тикилишчивалин министрин вазифйир вахтназ вуди тамам апIурайи Бахтияр Уллаев, Мягьячгъала шагьрин мэр Юсуп Умавов ва жарадар айи.
Думу йигъан республикайин 163 йитимриз хулар гъадагъру сертификатар тувну.
Му серенжемдикан узу Табасаран райондин администрацияйин делопроизводствойин ва кадрйирин ляхнин ихтиярариз лигру отделин кIакIначи пишекар Мягьямедяли Аьбдуловдихъди сюгьбат гъапIнийза.
Къайд дапIну ккундуки, райондин йитим бицIидарин месэлйириз лигурайир, дурариз сертификат тувбахьна кагъзар гьязур апIурайир М. Аьбдулов ву.
Дугъу гъапиганси, райондиан улупнайи 30 касдикан 10 касдиз сертификатар тувну. Дурар Мурадис Гьяжиуьсманов, Акбер Сардаров, Тимур Пирмягьямедов, Сайдулла Керимов, Эльвина Гагаева, Аьбдулла Гьяжиев, Мадай Мадаев, Шяйбан Байрамов, Мягьямед Мютелимов ва Тамила Сурхаева ву.
«Сертификат хал вая жил гъадабгъуз гьарсар касдин ччвурнахъ туврайиб ву. Думу СанПиНдин тIалабариъ улупнайи къайдайиинди хал гъадабгъузси, ипотекайин кредит ктипбаъра ишлетмиш апIуз ихтияр а. Гъийин йигъаз Табасаран райондиъ яшар 14 йислан зина вуйи 121 йитим гьисабназ гъадагъна. Дурар, яшариз дилигну, шубуб дережайиз жара дапIна: 14-йислан 17 йис’ина, 17 йислан 23 йис’ина ва 23 йислан зина вуйидар. Яшар 14 йис хьайиз вуйи йитимар опекайин ва попечительствойин хиликк шулу. 14 йис гъабхьиган, дурарин кагъзар администрацияйиз хътаура. Душваъ учу дурар хулар гъадагъуз кюмек вуди жара апIру сертификатдин нубатнахъ дерккрача. Гьаму йисан йитимариз Урусатдин фунуб йишваъ ккундуш хулар гъадагъуз ихтияр а. Гьамусдизкьан думу сертификатдихъ хулар вая жил анжагъ ДагъустандиътIан гъадабгъуз шулдайи», – гъапну Мягьямедяли Аьбдуловди.
Думу йигъан узу сертификатар гъадагъу Мадай Мадаевдихъди ва Эльвина Гагаевайихъди сюгьбат гъапIнийза. Чпи хабарсузди сертификатдин эйсйир гъахьивалиин дурар кьадар адрубкьан разиди айи.
«Узу Дарвагъ гъул’ан вуза. Багъри гъулаъ мектеб ккудубкIхъан, Воронеж шагьриз тикилишчивалинна архитектурайин институтдиъ урхуз гъушнийза. Юкьуд йисан бакалавриатдиъ, кьюд йисан магистратурайиъ дурхну, ич багахьлуйирихьна Екатеринбургдиз хялижвди гъушур, гьадушваъ ляхниъ дийигъунза.
Сертификат гъадабгъуз, гьяйиф, гъюз гъабхьундарзухьан. Думу гъадабгъуз узхъанди йиз аьхюну гъардаш гъушнийи. Ич хизандиъ узутIан аьхю чвйирра, чйирра ачуз. Амма дурар вари 30 йистIан артухъ дубхьнайидар ву. Дурар му программайик кахьрадар.
Сертификат гъадабгъуз заявка узу гьадму программа республикайиъ гьяракатнаъ убчIвхъанмина саки гьар кьюд йисак туври гъахьунза. Гьамус 28 йис вуйиз. Хал-хизанра, байра азуз. Узуз йиз хусуси хулар адарзуз, жара касарин хуларикк деънача. Гьаму сертификатдихъ, икибаштIан, хал гъадабгъуз шулдар, хъа ипотека гъадабгъуз диди ужуб мумкинвал тувру. Узуз сертификатдихъ гьаму йисхъанмина Урусатдин фунуб вушра шагьриъ хал гъадабгъуз шулу кIури, мялумат тувнийзуз. Мид’ин узу хайлин шад гъахьнийза, фицики узу лихурайи, йиз хал-йишв ккебгънайи шагьриъ гъузуз ният айиз. Думу сертификатдихъ гьамушваъ саб хулаз лигурза», – гъапнийи Мадай Мадаевди.
Эльвина Гагаева Табасаран райондин Хючна гъул’ан Хивна швуваз гъахир вуйи. Думу Хив райондин ЦРБ-йин гинекологияйин отделениейин аьхюну акушерка ву. Дугъаз 6 ва 5 йис яшариъ айи кьюр бай а.
«Дюзди гъапиш, узуз сертификат тувру кIури, миж ктайиз. Сертификатдихъ нубатнаъ дийигъну 6 йистIан артухъ вуйиз. Нубат фици гъябгъюраш ахтармиш апIури, узу йис ккебгъубси Табасаран райондин администрацияйиъ лихурайи Мягьямедяли Аьбдуловдиз зенг гъапIнийза. Дугъу июлин вазли РД-йин зегьметнанна яшайишдин артмиш’валин министерствойиз заявка тувну ккуниваликан мялум гъапIнийзуз. Узу душваъ заявка абцIруган, йиз нубат 317-пиб вуйи. Дидин кьяляхъ узу министерствойин сайтариъ учIври, сиягьдин кьадар гъябкъган, узу кахъудар кIури, фикир дапIну, компьютер ктIубшвунза. Амма улихьнаси узуз думу министерствойин вакили телефондиан зенг дапIну, «ичв заявка кьабул гъапIну, мубарак ибшри!» – гъапи. Умидихъ хъугъуз даршули гъахьунза. Шадвалиан йиз бицIидар хабаъ тIауриз, улариина нивгъра гъафнийиз. Думу сертификатдихъ хулар гъюрдар, хъа каркас гъадабгъуз ихтияр аш, юристдихъди гафар апIурза. ИкибаштIан, Мягьячгъала вая Каспийск шагьриъ хулар гъадагъуз планарик кайиз.
Узу нубатнахъ дийигънайи вари ихь табасаранариз сертификатдин эйсйир хьуб ккун апIураза. Думу гьадмукьан юкIв шад апIру ляхин ву», – гъапнийи ич сюгьбатнаъ разиди Эльвинайи.
Гъит, йитим духьну дердери ацIнайи юкIвар рази шлу ляхнар артухъ ишри.
