Гюльнара Мягьямедова
Мягьячгъалайиъ 12-пи сентябриъ «Ихь хулаз ислягьвал» кIул тувнайи Варихалкьарин форумди чан ляхин ккебгъну. Исламдин культурайин, илимдин ва образованиейин фонднан кюмекниинди РД-йин муфтиятди тешкил дапIнайи яркьу серенжемди ихь ва харижи уьлкйирин экспертар ва студентар уч дапIна.
Форумдин ляхниъ Иорданияйин паччагьлугъдин КIулин муфтий, шейх, доктор Аьгьмад Ибрагьим аль-Хасанат, Урусатдин азиат терефнан ДУМ-дин председатель Нафигулла Гьязрат Аширов, Урусатдин азиат терефнан ДУМ-дин попечительский советдин председатель, КIулин муфтийин теклифчи Ринат Насыров ва Ярхла Востокдин муфтий Рамазан Аьлиев, Ставропол крайин муфтийин заместитель Шигьабудин Гьюсейнов, Калмыкияйин муфтийин заместитель Ражаб Зиявудинов, Адыгеяйин ва Краснодар крайин муфтийин заместитель Азамат Хуштов, Булгарияйин исламский академияйин мялим, шейх Мугьяммад Айман аз Захрави, думу академияйин ректор Фяргьят Хуснутдинов ва хайлин жара аьлимар иштирак шула.
12-пи сентябриъ форумдин дахилнаъди дуфнайи хялари-экспертари республикайин 11 вуздиъ студентарихъди гюрюшар гъухну.
Форумдин ляхин 5 секцияйин бинайиинди кIули гъубшну: «Сабвал ва хатIасузвал», «Кюкдихъ хъайи регион», «Мюгькам хизан – сагъу жямяаьтдин бина», «Яшайишдин тереф уьбхювал ва рягьимлувалин кюмек», «Ислам диндиъ ватанпервервал, Ватандихьна вуйи ккунивал».
Форумдин дахилнаъди студентар Урусатдин регионарин ва харижи уьлкйирин машгьур экспертарин – муфтйирин, уьлкейиъ айи исламдин вузарин ректорарин, ислам ва хачперез динарин аьлимарин улхбарихъ хъпехъну.
«Сабвал ва хатIасузвал» кIул тувнайи секция Дагъустандин гьюкуматдин университетдиъ Нафигулла Гьязрат Ашировдин, Ринат Насыровдин ва Рамазан Аьлиевдин иштираквалиинди кIули гъубшнийи. Секцияйиъ, ислягьвалиинди яшамиш хьувалин важиблуваликан улхури, экстремизмдиз ва терроризмдиз аьксивал улупбан, илзигувал тянкьид апIурайи ислам диндин асуларин месэлйир гъял гъапIнийи.
Дагъустандин гьюкуматдин педагогвалин университетдиъ, Дагъустандин гьюкуматдин гъулан мяишатдин университетдиъ ва жара вузариъ кIули гъушу секцийириъ экспертари студентариз регион артмиш хьувалик жигьилари киврайи пайнакан, аьдати хизан жямяаьтлугъдиъ ислягьвал ва къайда уьбхбан заминвал вуйиваликан ва хайлин жара месэлйирикан ктибтнийи.
Экспертари гьацира жямяаьтлугъдиъ ислягьвал ва саламатвал уьбхбак диндин образованиейи киврайи пайнаканра гъапнийи. Дурари къайд гъапIганси, диндин асуларин гъавриъ дюзди ахъували жара дин хъапIрударихъди албагну яшамиш хьуз, жигьиларин арайиъ экстремизм ва радикализм тарабгъувал зяиф апIуз, ватандаш фикир арайиз хуз мумкинвал тувра.
12-пи сентябриъ Мягьячгъалайин кьялан майдандиин форумдиз дуфнайи хялар ва динагьлийир Мягьямед пайгъамбрин (с.аь.с.) бабкан хьувалин йигъаз бахш дапIнайи мажлисдиъ иштирак гъахьну.
