2010-пи йисан 15-пи декабри Дагъустандин халкьарин 3-пи съезд кIули гъубшнийи. Душваъ асас вуди жямяаьтлугъдин арайиъ экстремизм ва терроризм тарабгъбахъди аьлакьалу месэлйир гьял гъапIнийи. Думу съезддиъ Дагъустандин халкьарин дуствалин ва сабвалин лишан вуди, республикайин машквар тяйин апIбан къарар адабгънийи. Съезддиъ удучIвну гъулху Дагъустандин президент Мягьямедсалам Мягьямедовди гъапиганси, аьхиримжи йисари террористарин хилариан фукьан инсанар гъийихнушра, Дагъустандин жямяаьтлугъ терроризмдин ва экстремизмдин хатIалувалин гъавриъ гъахьундар, думу тянкьид гъапIундар. Гьадди республикайин политикайинна экономикайин артмиш’вализ манигъвал апIура.
«Гъийин деврин жигьилар дагълуйирин эдеблувалин ва намуснан шартIарихьан ярхла духьна. Жямяаьтлугъдиъ дагълуйириз хас дару чIуру гъиллигъар, гьярисвал, инсандиз илзигувал, эдебсузвал тарабгъувал яркьу шула», – гъапнийи республикайин кIулиъ айири. Съезддиъ, Дагъустандин халкьарин дуствалин ва сабвалин лишан вуди, республикайин машквар тяйин апIуз къарар адабгънийи ва цIийи машкври, му жягьтлувалин терефкрарин дагълуйирин аьдатар уьрхюз кюмек дапIну ккундийи.
2011-пи йисан 6-пи июлиъ адабгъу Дагъустан Республикайин Президентдин указдиъ гьамци дибикIна: «Дагъустан Республикайин гизаф миллетарикан ибарат вуйи халкьдин сатIивал уьбхбан бадали, сентябрин 15-пи йигъ Дагъустандин халкьарин сабвалин йигъ вуди тяйин апIуб ва гьар йисан 15-пи сентябриъ къайд апIуб». Думу йигъ кьастнаан ктабгъуб дар, 1741-пи йисан 15-пи сентябриъ дагълуйирин армияйи Надир-шагьдин кьушмар гьергуз гъиту йигъ ву.
Дагъустан Республика Урусат-дин уткан регионарикан саб ву. Дагъустандин тарих читинуб гъабхьну. Гъирагъдиан алжагъру душманди дагълу уьлкейин халкьарихьди, саламатди яшамиш хьуз гъитри гъабхьундар. Душмандихъди гъуху женгариъ ихь халкьди улупу гьунарари гъи Дагъустандиъ айи аьгьвалат гъизгъин апIурайи экстремизмдин ва терроризмдин кьувватарихъди женг гъабхуз дих апIура.
Ихь азадвал ккуни дирбаш халкьди чан тарихдиъ жвуван Ватандихьна вуйи ккунивал улупури, душмандихъди вуйи дявдиъ гъалибвал гъадабгъуз вари кьувватар сарф апIури гъахьну. Гъира агъзрариинди дагъустанлуйир Урусатди Украинайиъ гъабхурайи хусуси метлеб айи дявдин операцияйин женгариъ иштирак шула. Далу терефнаъ айидарра сикинди дар – женгнаъ айи эскрариз лазим вуйи алатар ипIруб-убхъруб палат хътаури, дурарик гьевес капIра. Гьадди республикайин халкьаринси, вари ихь уьлкейин халкьаринра сабвал улупура.
Гьюрматлу ватанагьлийир! Улубкьурайи Дуствалин ва сабвалин машквар учвуз мубарак ибшри! Ихь бицIи ватан Дагъустан ва аьхю ватан Урусат бадали алдабгъурайи гьарсаб лик ягъурлуб, хъуркьувалар айиб ибшри. Урусатди гъабхурайи хусуси метлеб айи дявдин операцияйиъ гъалибвал гъадабгъну, душваъ иштирак шулайи гьарсар кас сагъ-саламатди чпин хизанарихьна хъадакну гъюри.
