Мейлан Нежефов

Табасаранарин яшайишдиъ гьарсар касдин марцакк гату ва гьяятдиъ ху дубхьну ккунивал аьхю абйир-бабарилан гъубзнайи аьдат ву. Хив райондиъ Асккан Яракк гъулаъ яшамиш шулайи Исабеговарин хизан гъи му ирснан шил уьбхюрайи ужагъарикан саб ву.

Хизандин кIул Аьшурбег Исабеговди инсандин бицIи дустарин гьякьнаан гьамци ктибтура: «Йиз ликри жил гъибисхъанмина ич хизандиъ гату ва ху адру вахт кIваинди дарзуз. Хизандин улихь хьайидари, хуна гату гьарган ихь гъуллугънаъ айи гъаравлар ву кIури, дурариз тюмер апIури, хябяхъ-гвачIин гъапIу мани хурагнакан ккапIри, хатир-гьюрматниинди илтIикIури шуйи. Вари гъулан агьалйирси, нежбервалин таб ва дин-тIяаьтдин гьякьнаанра ужудар аьгъювалар айи ич аьхю абайин ихтилат зат кIваълан гъябгъюдариз. «Жан баяр, ихь Мягьямед пайгъамбри чан гъудгникк ккипру ургмин лугриин гату дабхънайиган, дидиз гьич вишткьан дарапIди, ургмин луг хътабтIну. Учвуз му нумуна ибшри. Узуз апIру гьюрмат ихь гатдиз ва миди вуйи бицIи дустариз апIинайи» – васият апIуйи дугъу. Абайин му гафар узуз уьмриз дарсар гъахьну. Хизандин арайиъ гату бицIину веледси шулич, хъа чIат-чIурдиз удучIвруган ху – аьхю юлдашси».
Йиз сюгьбатчийи чан маракьлу ихтилат, сацIиб вахтна ккебехъну давам гъапIнийи. «Ху хъебгруган, нивкI’ан уягъ шулчу, хъа гатдихъан ниъ гъюра кIури, гъи бязи хизанар дурарихьна вягьши гьяйванатарихьнаси лигура. Узлантина вуйи веледариз ич хизандин тарихнакан ктибтури, гатуна ху инсандин вафалу дустар вуйибдин гъаврикк ккаъри шулза. Закур веледари гьапIруш аьгъюр Аллагь ву. Хъа гъи, уз’ин жан илимбукьан гагьди, йиз хизандин мешреб вуди марцакк кьюлариин цIа иливуз гату, хъа жвуван икризди кIикIлар ахьру «дустарихъ» хъебгуз ху гъуздич», – гъапнийи Аьшурбег Исабеговди.