Гюльнара Мягьямедова
Сочийиъ деврин журналистикайин «Вари Урусат-2024» 18-пи форумди чан ляхин давам апIура. Думу форум цирклин важиблу месэлйир гьял апIуз мялуматарин дакьатарин вакилар сатIи апIру гьар йисан гъабхру серенжем ву.
Гьаму йисан Дагъустандин экспозиция Урусатди гъабхурайи хусуси метлеб айи дявдин операцияйин республикайиан вуйи игитариз, гьацира РД-йин халкьдин шаир СтIал Сулейман бабкан духьну 155 йис тамам хьпаз бахш дапIна.
Сочийиз душнайи Дагъустандин делегацияйин дахилнаъ РД-йин мялуматарин ва чап апIбарин агентствойин кIулиъ айи Аьбдуразакь Жамалутдинов, Урусатдин журналистарин союздин региондин отделениейин председатель Мягьямед Ибрагьимов, «Дагъустан» этномедиахолдингдин кIулиъ айи Арсен Юсупов, гьацира гьюкуматдин мялуматарин дакьатарин вакилар а.
Дагъустандин стенддихьна садпидарин арайиъди гъафи Урусатдин журналистарин союздин председатель Владимир Соловьевди Дагъустан гьар йисан форумдихьна ужуди гьязур шлуваликан гъапну.
Мидланра савайи, дугъу экспозиция тешкил апIбан ляхниз заан кьимат тувну, учв Хасавюртдин йикьрар йитIруган, думу гьядисйириъ иштирак хьуваликан, яракьлу гъалмагъал айи вахтнаъ журналистси швнуб-сабан Дагъустандиз гъюваликан гъапну.
Форумдин дахилнаъди 1999-пи йисан Дагъустандин ругариина гъафи варихалкьарин бандитарин дестйир терг апIбаз бахш дапIнайи гергми стол ва шикларин выставка гъабхиди.
«Аьдат вуйиси, Урусатдин журналистарин союзди гьязур дапIнайи журналистарин «Вари Урусат» форумдиъ Дагъустан гьар йисан иштирак шулу ва тялукь стенд гьязур апIуру. Цци мина дубхьнайи шикларин выставкайиз 1999-пи йисан шиклар йивру мухбирари, журналистари уч дапIнайи шиклар адагъна.
Узухьна гъарашугъар гъюри, му темайиан гергми стол гъабхбан гьякьнаан суалар тувра, фицики тема маракьлуб, инсанарин кIвак кучруб ву», – къайд гъапIнийи РД-йин мялуматарин ва чап апIбарин агентствойин кIулиъ айи Аьбдуразакь Жамалутдиновди.
Мягьямед Ибрагьимовди стенддин экспозиция республикайиз важиблу вуйи гьядисйириз бахш дапIнайиваликан, Дагъустандин стенд ккабалгруган ва думу ачмиш апIруган, Дагъустандин милли сурат, рангар уьбхюз чалишмиш хьуваликан гъапнийи. Экспозицияйихьна гъюрайидарин фикриинди, Дагъустандин стенд жара регионарин стендарихьан чан утканвалиинди, деврин дизайндиинди тафавутлу ву.
Дагъустандин делегацияйи регионарин журналистарин союзарихъди гюрюшар гъахуб, Татарстандин ва Мордовияйин журналистарин союзарихъди йикьрар йитIуб планламиш дапIна.
Гьаму йисан Дагъустандин журналистарин союздин 65 йис тамам шула. Юбилейихъди аьлакьалу серенжемар гъахбан месэлйир гьял апIбан бадали, Сочийиз душнайи делегацияйин вакилар Урусатдин журналистарин союздин кIулиъ айидарихъдира гюрюшмиш хьпанди ву.
