Улихьна йигъари ич мухбир Ражаб Нуров Хючнаарин сабпи нумрайин кьялан мектебдин директорин заместитель, «Точка роста» образованиейин центрин руководитель Аьбдурягьман Мусаевдихъди гюрюшмиш гъахьну. Дурарин арайиъ гъабхьи сюгьбат жикъиди исихъ чап апIурача.
– Аьбдурягьман Пашаевич, ичв мектебдиъ ачмиш дапIнайи «Точка роста» образованиейин центриз фицдар мумкинвалар айичв?
– Мектебдиъ «Точка роста» абццну жикъи вахттIан даршра, учуз лазим вуйи авадлугъарихъди, вари шей’арихъди тямин дапIначу, гьаддиз хъуркьувалар гъадагъуз мумкинваларра артухъ духьна. Душваъ учу гьамцдар авадлугъар ишлетмиш апIурача: 3 принтер, квадрокоптер, ноутбукар, урхбанна методикайин материалар, моделирование апIбан ва жара лазим вуйи шей’ар ва алатар. Ич Центри, чпик кайи бажаругълувалар артмиш апIбан бадали, мектебдиъ урхурайидариз инсан ва дугъан меденият аьгъю апIбан ва цифрайин жюрейин образование тувру. Гьацира асас образованиейин программйириан гьязур апIру классра ачуз. Компьютерарихъ ОБЖ-йиан, информатикайиан, шахматариан ва жара чпиз лазим вуйи предметариан аьгъювалар гъадагъуз мумкинвал а. Му ляхин гъуларин мектебариъ урхурайи баяр-шубарин аьгъюваларин дережа шагьрарин мектебариъ урхурайидарин дережайихьан тафавутлу даршлуганси албагна. Дидин метлеб – дарсар адру вахтна бицIидари чпин бажаругълувалар артмиш апIувал ву.
– Гьаму ляхин заан дережайиинди кIули гъабхбан бадали, учвуз компьютерихъ ляхин апIбан курсар ккудукIу ужудар пишекрар айин?
– Гьадму месэлайин гьякьнаан онлайн саягъниинди Мягьячгъала шагьриъ аьгъювалар гъадагъну, мялимари сертификат гъадабгъура. Гьаддиз учу юкIв хъайи касариз чпин фикрар, бажаругълувалар артмиш апIуз аьхю мумкинвалар туврача, варидариз ич мектебдин «Точка роста» образованиейин центриз теклиф апIурача.
Ич мектеб, гъябгъюрайи девриз тялукь вуйи технологйир ишлетмиш апIури, аьгъювалар тувбан цIийи къайдйир агру, дурар ляхниъ ишлетмиш апIру ва заан хъуркьувалар гъазанмиш апIру центриз илтIибкIна. Думу «Табасаран район» МР-ин образованиейин Управлениейин бинайин мектеб ву.
Гъи му мектебдиъ методикайин 10 объединение лихура, 321 баяр-шубари урхура, лап фикирлу бицIидарихъди гьаммишан ляхин гъабхура. Гьацира бицIидарин урхувал кьяляхъ диривбан бадали, абйир-бабарихъди гизаф ляхин апIура. Табасаран райондиъ тешкил апIурайи образованиейин гизафсдар серенжемар Хючнаарин сабпи нумрайин кьялан мектебдин бинайиин кIули гъягъюра.
– Аьбдурягьман Пашаевич, учвуз ляхниъ заан хъуркьувалар ккун апIураза. Ичв хиликк гъурху зигьимлу баяр-шубар Урусатдиъ заан дережайин вузариъ урхруганси ибшри.
