5-пи февралиъ Дагъустандин вице-премьер Аьбдулмуслим Аьбдулмуслимовдин регьберваликкди кIули гъубшу совещаниейиъ Табасаран райондин гъулан мяишатдин сурсат уьбхбан ва тартиб апIбан циркил артмиш апIувалихъди аьлакьалу месэлйир гьял гъапIну.
Совещаниейин ляхниъ РД-йин Главайин ва Правительствойин администрацияйин кIулиъ айи Нюсрет Уьмаров, Табасаран райондин глава Мягьямед Къурбанов, Табасаран райондин Гьарихъ гъулаъ бабкан гъахьи ва гьамусяаьт Казахстандин Атырау шагьриъ яшамиш шулайи инвестор Гьяжибег Аьлибегов (шиклиъ) иштирак гъахьнийи.
Дурарин арайиъ гъабхьи сюгьбатнаъ инвестори къайд гъапIганси, дугъу чан хусуси дакьатар ишлетмиш дапIну, 5 агъзур тонна йимишар, мейвйир уьрхюз мумкинвал айи йишв ва консервйир гьясил апIру завод тикмиш апIуз планламиш дапIна. Гъийин йигъаз Гьяжибег Аьлибеговди гъулан мяишатдин сурсатарин гьясиллувализ 10 миллион манатдиинакьан пулин дакьатар харж дапIна. Думу гьацира деврин тIалабариз гъилигу кирпчар гьясил апIру заводра тикмиш апIбанди ву.
Вице-премьер Аьбдулмуслим Аьбдулмуслимовди гьаму проектар уьмриз кечирмиш апIбаъ гьюкуматди инвесторин тереф уьбхюрайиваликан гъапнийи. Дугъу гьюкуматдин терефнаан гъапIу харжарин 20-дилан 60 процентдиина кьяляхъ тувуз айи мумкинаваларикан мялум гъапIнийи.
