Мейлан Нежефов
Мялум вуйиганси, гьар йисан октябрин хьудпи йигъ Мялимарин пишекарвалин йигъси къайд апIуру. Гъийин йиз макьалайиъ халис мялим, жямяаьтлугъ кас ва гьамус эскервалин буржи тамам апIурайи ватанпервер Марат Аьзизовдикан (шиклиъ) ктибтуз ккундузуз.
Марат Аьзизов 1973-пи йисан 8-пи августди Хив райондиъ Асккан Ярккарин гъулаъ бабкан гъахьну. 1979-пи йисан багъри гъулан мектебдин сабпи классдиз гъушну ва 1990-пи йисан мектеб тафавутлувалиинди ккудубкIну.
1990-пи йисан думу Дагъустандин гьюкуматдин педуниверситетдин физикайин факультетдик кучIвну.
Чан зегьметнан рякъ Маратди 1995-пи йисан вуз ккудубкIну, багъри гъулан мектебдиъ физикайин, математикайин ва информатикайин мялимди лихуз хъюгъбалан ккебгъну.
Уьмрин тIалабари сабцIиб вахтна Марат хизандихъди гъул’ан Тульский областдин Ясногорский райондиъ яшамиш хьуз мажбур гъапIнийи. 2003-2005-пи йисари дугъу мялимвал гьадушваъ давам гъапIнийи. Марат Аьзизовди, багъри гъулаз дуфну кьяляхъ, мектебдиъ лихувал давам гъапIнийи. Заан категорияйин мялим ва РФ-дин образованиейин лайикьлу гъуллугъчи, образованиейин цирклиъ ужуб тажруба ади гъабхурайи баркаллу ляхниз лигну, думу 2017-18-пи урхбан йисан чпин гъулан мектебдин директорди ктагънийи.
2024-пи йисан 16-пи январи Маратди Урусатдин Яракьлу кьувватарихъди сад йисаз вуди контракт гъийибтIнийи.
Мялимвалин машквран гъаншариъ узу дугъахъди сюгьбат гъубхнийза.
«Гьамусдин хайрар, дуст. Яв зенг гъябкъиган, дишла ихь шаир, мялим, Ватандин Аьхю дявдин иштиракчи Багьаудин Митаровдин «Хабар тув ихь дустариз» шиърин «Ватан уьбхру кьягьяларин вахт дуфна, Азадвалин женгнаъ а йип дустариз!» кьюб цIар кIваин гъахьнийиз. Вари ужуйи ву, фикрар мапIан. ГьубкIну ипIрубра, алабхьрубра ачуз, шюкюр Аллагьдиз. Саб гафниинди, хъана ихь шиърихьна гъюраза «Хабар ибшри дурариз йиз уьмрикан – Кефнаъ а, йип, хабар тув ихь дустариз» (cаб аьхю гья-гьяра гъивнийи). Мушваъ узу ишлетмиш апIурайи ччвурра (позывной) «Мялим» вуйиз.
Узу аьхю пулар, ясана гъуллугъар ккунди гъафир, я дурарихъ хъергнайир дарза. Хъа уччвуйи фикир гъапIган, узухь гъуллугъра хьтайинхъа? Анжагъ йиз аьшкьниинди ва ухь’ина алжагънайи гъаних душман гуршвуз кьаст ади гъафир вуза. Мидланра савайи, гьар гьяфтайиъ йиз мектебдин икриъ итни йигъан Урусатдин ва Дагъустандин пайдгъар завуз за апIури, гимнарихъ хъпехъури, баяр-шубарин улихь ватанперверваликан улхури гъахьунза. Дугъриданра, гьадди узук магьан хлинццарра кивну.
Ватан уьбхру кьягьяларин арайиъ узура айивалиин швумал дарза. Ухьухь вари ккебгърайиб ва шулайиб ужувлахъинди ву кIури шулу. Ин ша Аллагь, ухди-кьанди мидин аьхир хьибди ва ихь юрдариъ, гьарганси, гьевеслу бюлбюл жакьвли ислягьваликан чан мяъли апIиди», – гъапнийи Марат Аьзизовди.
Гьамци, заан дережайииъди ватанпервервал гьисс апIурайи Марат Аьзизов «Жюрэтлувализ лигну» медализ улупна. Гьаму йигъари медаль мухрик кади гъюру игит адашдиз – дугъан юкьур веледдихъди ва уьмрин юлдаш Назидайихъди ухьура вари ккилигидихьа.
