Мейлан Нежефов
Хив райондиъ Идрисоварин хизан таниш дару кас гьеле-меле адаршул. Дагъустан Республикайин искусствйирин лайикьлу гъуллугъчи, Урусатдин гьюрматлу балетмейстер, «Дагъустандин игит» гъизилин хядран сагьиб, аьхю кьадар заан ччвурарин эйси ва премйирин лауреат Назир Къаитмазович Идрисовди ихь халкьдин ад за апIбак аьхю пай кивра. Му ляхниъ дугъаз уьмрин юлдши ва ляхнин гъарашугъ вуйи Екатеринайира чаан удукьру кюмек тувра. Абйири туву марцци тербияйи дурарин бай Заурихьди, Ватандииз читин вахт улубкьнайиган, гъирагъдиъ гъузуз гъибтундар. Думу 2022-пи йисан СВО-йиз гъушну. 2023-пи йисан дугъу, миллетчйирихьан багъри Ватан уьбхюри, чан жан фида гъапIу. Дупну ккундуки, Заур Идрисов Чечендиъ гъахьи дявдин гьяракатарин ветеранра вуйи.
Урусатди Украинайин жилариин гъабхурайи хусуси метлеб айи дявдин операцияйиъ талаф гъахьи ихь ватанагьли Заур Идрисовдин гьюрмат уьбхюри, улихьна йигъари багъри Хив гъулаъ Идрисоварин хуларихъ хъайи баруйин цалиъ дугъан сурат кайи мармардашдин гъван ибтнийи.
Му ватанпервервалин серенжемдиъ игитрин багахьлуйир, Хив райондин, Хиварин гъулан кIулиъ айидар, муниципалитетдин депутатарин Советдин ва Хив ва Агъул районарин военкоматдин, Сарпидарин гьяракатдин вакилар ва волонтёрар иштирак гъахьнийи.
«Учвухъди ичв гъянаъ аьгь апIуз даршлу учIвру дерд учура пай апIурача. Ватандиз гьамцир игит бай багъиш гъапIу учвуз чухсагъул. Миллетчйирихъди женг гъабхуз ният ади, Заури чан хушниинди аьрза гъибикIну ва СВО-йиз гъушну, жил`ина гьякьвал тасдикь апIбак чан хусуси пай кивну. Игитвалиинди ихь арайиан гъушу Заурикан ухьу гьар вахтна ктIатIарццди улхидихьа. Хизандиз алахьурайи читинвалариз райондин администрацияйин терефнаан кюмек тувуз гьарган гьязур вуча», – гъапнийи Хив райондин кIулиъ айи Ярмет Ярметовди.
Райондин администрацияйин ва агьалйирин терефнаан чпин хизандиз апIурайи гьюрматназ, му хажалатнан йигъари чпихъди хъайивализ Назир ва Екатерина Идрисовари аферин мялум гъапIнийи.
«Сарикра веледдикан юкIв сефил шлу гаф-чIал ктрубкIричвук. Ич бай Ватандиз вафалувалуди уьмриан гъушну. Уьмрин рякъюъ алахьурайи рижун зазарихьан думу зат ул хьайир дайи. Учу дугъан адаш ва дада вуйивалиин фурс ва дамагъ апIурача. Гъит ихь имбу баяркьан сагъ-саламатди хъадакну чпин хизанарихьна гъюри», – гъапнийи Идрисовари.
Хиварин гъулан глава Фахрудин Рамазановди ич сюгьбатнаъ къайд гъапIганси, Заур Идрисов аргъаж шулайи наслариз гьарган нумунади гъузди. «Заури намуслуди Урусатдин Яракьлу кьувватарин жергйириъ гъуллугъ апIури гъахьну. 2022-пи йисан чан хушниинди СВО-йиз гъягъбиинди дугъу ихь арайиъра игитар айиб сабсан ражари субут гъапIну. Умудлу вуза, игитарин сиягьнаъ Заурин ччвурра аьсрариинди ихь тарихнаъ гъубди. Ухьуз шлу игитар дявдин майднариндар даришри. Хъа гьапIхьа? Вахтну дурар ктагъну. Ва чан имтигьян Заури лайикьлуди тувну – ухьу кIул за дапIну лицру агьалйирин цIарнаъ хьпан бадали», –гъапнийи Фахрудин Рамазановди.
