Улихьна йигъари Сергей Меликов хусуси метлеб айи дявдин операция гъябгъюрайи зонайиз гъушну ва Дагъустандиан вуйи эскрарихъди гюрюшмиш гъахьну.

Каспийский флотилияйин гьюлин пехотайин 177-пи гвардейский полкнан ва «Каспий» батальондин вакиларихъди вуйи гюрюшдиъ Дагъустандин кIулиъ айири эскрариз мототехника, тепловизорар, дронар ва хайлин лазим шлу жара алатар тувнийи.

Хусуси метлеб айи дявдин операцияйиъ лишанлу гъахьидариз Сергей Меликовди наградйирра тувну. «Сифте кIул’ан учвуз варидариз, Ватандин улихь ичв буржи дирбашди, намуслувалиинди, гьякьлуди тамам апIурайивализ дилигну, чухсагъул мялум апIуз ккундузуз. Учвуз дявдин женгариъ хъуркьувалар ккун апIураза. Учву гъалибвалра хьади гъюбаз учу вари ккилигурача. Учу учву кIваълан гьаърадарча, дявдин операцияйин месэлйир тамам апIузси, ичв хизанар ва багахьлуйир уьрхюзра республикайи учвуз гележегдиъра кюмек апIиди», – гъапну Сергей Меликовди.

Республикайин Главайин хилариан наградйир эскраризси хусуси метлеб айи дявдин операция гъябгъюрайи ругариин чпин пишекарвалин ва инсанвалин буржи тамам апIурайидаризра тувну. Дурарин арайиъ «Каспий» батальондин имам Мугьяммад Мукошдибиров ва Дагъустандин журналист Гьюсейн Гьюсейнов а.

Сергей Меликовди гьацира меценатарин ва рягьимлувалин фондарин иштираквалиинди Дагъустандиан вуйи эскрар гьаммишан рягьимлувалин кюмекнахъди тямин апIувализ дилигну, Урусатдин Президентдин багахь хьайи Дагъустандин вакиллувалин идарайи гъабхурайи ляхнизра заан кьимат тувну.