Гюльнара Мягьямедова

2-пи октябри Дагъустандиъ Варихалкьарин динарин арайиъ вуйи жигьиларин 11-пи форум ачмиш гъабхьну. Думу 5-пи октябризкьан давам хьибди.

 

Форумдиъ терроризмдин ва экстремизмдин идеологияйин профилактикайин месэлйириин машгъул духьнайи гьюкуматдин гъуллугъчйир ва жямяаьтлугъ касар, илимдин интеллигенцияйин ва экспертарин тешкилатарин вакилар, диндин аьлимар, хусуси метлеб айи дявдин операцияйин иштиракчйир ва СВО-йин игитарин дадйир, гьацира Урусатдин регионариан, харижи уьлкйириан вуйи жигьилар иштирак шула.
Форум ачмиш апIбан серенжемдиъ региондин Правительствойин председатель Аьбдулмуслим Аьбдулмуслимов, РД-йин милли политикайин министр Энрик Муслимов, Дагъустандин ругариин хъаърайи динарин тешкилатарин кIулиъ айидар – Мягьячгъалайин ва Грозныйин архиепископ Варлаам, Дагъустандиъ айи жугьдарин общинйирин советдин председатель Валерий Дибияев, муфтиятдин председатель Аьбдулла Салимов иштирак гъахьнийи.

Серенжемдин иштиракчйириз салам тувну, Аьбдулмуслим Аьбдулмуслимовди, деврин наслариз рюгьнанна эдеблувалин жигьатнаан тербия тувбан бадали, республикайиъ Варихалкьарин динарин арайиъ вуйи жигьиларин форум гъабхбан важиблуваликан гъапнийи. «Му форум Урусатдиз ва Дагъустандиз аьсраринамина хас вуйи динар, жюрбежюр динар хъаърудар ва жюрбежюр миллетарин вакилар албагну яшамиш хьпан, агьалйириз ватанпервервалин тербия тувбан, жара динарихьна ва аьдатарихьна рягьимлувалиинди ва гьякьлуди лигбан кьувватлу дакьат ву», – гъапну, жигьиларихьна илтIикIну, Аьбдулмуслим Аьбдулмуслимовди.

Фестивалин дахилнаъди сюгьбатар гъахру майднар, республикайиъ хъаърайи динарин ляхнарикан хабар туврайи выставка ачмиш дапIна ва саб жерге жара серенжемар гъягъюра.