Наргиз Гюлечова
Гьаму йигъари Саударин Аравияйиан Дагъустандиз инвестицйирин ва стратегияйин партнерствойин вари халкьарин арайиъ вуйи центрин регьбер Ибрагьим Дахи Аль-Дхахи кIулиъ ади аьхю делегация гъафнийи.
Дуфнайи хялар республикайин Правительствойин председатель Аьбдулмуслим Аьбдулмуслимовди къаршуламиш гъапIнийи.
Республикайиз дуфнайи делегация-йихъди вуйи гюрюш Мягьячгъалайин Дуствалин хулаъ, республикайин министерствйирин ва ведомствйирин вакиларра иштирак духьну, кIулиъ гъубшну. Серенжемдиъ гаф-чIал кьюбрид терефари сатIиди ляхнар апIурайи циркларин месэлйирикан гъабхьну.
Дагъустандина Саударин Аравияйи сатIиди ляхин апIбан йикьрар йитIувалин себебарикан саб республикайин гъулан мяишатдин сурсатар экспортдиз гьаувал ву, фицики Дагъустандиъ гьясил апIурайи заан ерийин марцци ва ицциб тIяаьмнан сурсатар наана-вушра гъахуз ярамиш вуйидар ву.
Саударин Аравияйиан дуфнайи хяларихъди вуйи гюрюшдиъ Дагъустандин гъулан мяишатдин ва ипIру-убхъру сурсатарин министр Мухтарбий Аджековди мялум гъапIнанси, республикайиан асас вуди экспортдиз хътаурайи сурсатар малин, чарвайин ва пеълин йикк, дюгю, мал-чарвайин алдабхънайи лиъ, хьа, табиаьтдин ва минералин шид, йиккун, йимишдинна мейвайин консервйир, балгъар, хю, пIялцIук, йиччв ва таза тIумутI ву.
«Республикайин гъулан мяишатдин хутIлариз шид зигбан бадали гьюкуматдин терефнаан тувнайи кюмекниинди, ккудубшу йисан республикайиъ 156 агъзур тоннайин дюгю ккадабцIну. Дагъустандиъ гьясил апIурайи дюгдин саспи жюрйир Урусатдин вари регионари хушниинди масу гъадагъура. Гьацира, Дагъустандин дюгю гьясил апIурайи саспи карханйириз Турцияйиз, Азербайжандиз ва Таджикистандиз дюгю хътапIбан тажрубара а, ва багарихьди Узбекистандихъдина Ирандихъди сатIиди ляхин апIувалра ккабалгиди. Хъа Саударин Аравияйин Паччагьлугъдихъдира гъулан мяишатдин цирклариан сатIиди ляхин апIури, теплицйир диври, яр-йимиш уьбхру, гъулан мяишатдин сурсат гьясил апIру йишвар тикмиш апIури, ляхин кIулиъ гъабхбаъ аьхю мумкинвалар шлувалиин умудлу вуча», – гъапну Аджековди.
