Гюльнара Мягьямедова
1-пи октябрилан башламиш дапIну, Урусатдиъ чвулин призывдин кампания гъябгъюра. Дидин гьякьнаан Урусатдин Президент Владимир Путинди асас указдиин къул гъизигну. Документдиз асас вуди чвулин призыв 2024-пи йисан 31-пи декабризкьан давам хьибди. Армияйиъ гъуллугъ апIуз вари уьлкейиан 18 йислан 30 йис’ина яшар духьнайи 133 агъзур кас гъягъиди.
КIваин апIурача, призывдиз дих апIру жигьиларин яшнан вахт 2024-пи йисан 1-пи январихъан дигиш гъапIнийи. Улихьна 27 йис яш гъабхьидариз армияйиз дих апIурадайиш, гьамус 30 йис тамам хьайизкьан жигьилариз эскервалин буржи тамам апIуз буржлу ву.
Медицинайин комиссияйи дявдин гъуллугъназ гъягърударин сагъламвалин дережа аьгъю апIуру. Вари 5 дережа а:
– фуну жюрейин кьушмарин жергйиризра дявдин гъуллугъназ гьауз шлу призывникар (А);
– сагъламвалин аьгьвалат цIибдитIан харжиди дарудар, дявдин гъуллугъназ гьауз шлудар (Б);
– ислягь вахтнаъ призывдихьан азад дапIну, запасдиз гьаърудар (В);
– сагъламвалин аьгьвалатназ дилигну вахтназди кьяляхъ апIрудар (Г);
– армияйиз дих апIбахьан азад апIрудар (Д).
Армияйиъ гъуллугъ апIру вахт дигиш дубхьнадар, думу улихьнаси гьамусра 12 ваз ву. Армияйиз гъягъру баяр уч шлу пунктариан 15-пи октябрихъан чпи гъуллугъ апIру частариз гъахуз хъюгъди.
Призывникариз повесткйир улихьнаси гьамусра кагъзиъди тувра. Эгер повесткайиин къул дизигнайи жигьил себеб адарди 20 йигъандин арайиъ военкоматдиз дарфиш, думу армияйиъ гъабхру гъуллугънаккан кIул ккадабгъурайирси гьисаб апIуру, дугъ’ин журум илибтIуру.
Призывникар хусуси метлеб айи дявдин операция гъабхурайи йишвариз гьаърадар. Дурари Урусатдин ругариин дявдин частар ерлешмиш духьнайи йишвариъ гъуллугъ гъабхиди.
Чвулин призывдин вахтна Дагъустандиан дявдин гъуллугъназ 1994-2006-пи йисан бабкан гъахьи 3,5 агъзур жигьил гъягъиди. Дидин гьякьнаан Дагъустан Республикайин дявдин комиссарин вазифйир тамам апIурайи Аьбдурягьман Мурадхановди мялумат тувну.
Уьлкейиъ гъябгъюрайи призывдин кампанияйихъди аьлакьалу серенжемар Табасаран райондиъра ккергъна. Гьаци, 7-пи октябри райондин администрацияйиъ муниципалитетдин глава – призывдин комиссияйин председатель Мягьямед Къурбановдин регьберваликкди чвлин призывдин комиссияйин заседание гъабхьну. Заседаниейин ляхниъ хьадукран призывдин кампанияйин натижйирикан ва чвулин призывдин серенжемар гъабхбан асас месэлйирикан гъулхну.
Табасаран райондин военный комиссариатдин призывдиз ва военный гъуллугъназ агьалйир гьязур апIру отделин начальник Рафик Кьасумовди туву мялуматариз асас, Урусатдин Яракьлу кьувватарин жергйириз хьадукран призывдиъ Табасаран райондиан 87 жигьил гъухну. Чвулин призывдиз гъахру жигьиларихьна повесткйир тувна. Сабпи призывникарин десте 17-пи октябри гьауз планарик ка.
Военкоматдин гъуллугъчийин докладдихъ хъебехъну, Мягьямед Къурбановди гъуларин поселенйирин главйириз чвулин призывдин кампанияйиъ военный комиссариатдихъди, полицияйин ва ВУС-дин вакиларихъди сигъ аьлакьайиъ ляхин гъабхувал табшурмиш гъапIну.
