Гюльнара Мягьямедова
Гьар йисан 9-пи октябри дюн’яйиъ Почтайин гъуллугъчйирин йигъ къайд апIуру. Думу йигъ, почтайин аьлакьйир тямин апIбан бадали гъабхьиган, тешкил гъапIу Варидюн’яйин почтовый союздин сад йис гъабхьиган къайд апIуз хъюгънийи. Му союз 1874-пи йисан Швейцарияйин Берн шагьриъ арайиз гъафнийи. Урусатдин империя почтайин тешкилат арайиз гъабхи уьлкйирикан саб ву. Гьаму йисан тешкилат арайиз дуфну 150 йис тамам шула.
Варидюн’яйин почтайин йигъ къайд апIбан теклиф 1969-пи йисан Токиойиъ кIули гъубшу Варидюн’яйин почтайин союздин конгрессдиъ дивнийи. Гьаддихъанмина машквар гьар йисан вари уьлкйириъ къайд апIура.
Урусатдин почтайин аьлакьа Европайиъ варитIан яшлуб ву, дидин 1000 йистIан артухъ ву. Гъи «Урусатдин почта» компания уьлкейин федеральный почтайин ва логистикайин оператор ву: вари Урусатдиъ 38 агъзур отделениейи, агъзрариинди гъуллугъчйири миллионариинди муштарйирихъди ляхин апIура.
Варидюн’яйин почтайин союздин юбилейин йис фицдар хъуркьувалар ади къайд апIураш суал хьади, узу Дагъустан Республикайин УФПС-дин директорин заместитель, ихь ватангьли Зейнудин Рамазановдихьна илтIикIунза.
«Гъи Дагъустан Респуб-ликайиъ «Урусатдин почта» компания логистикайин варитIан чIатху оператор ву. Почтайин отделенйириъ 3600-диинакьан гъуллугъчйир лихура. 2023-пи йисан Дагъустандиъ Урусатдин почтайи ужуб гъазанж гъадабгъну. Думу ляхин почтайиз агьалйирин пенсия пай апIуз ихтияр тувували аьлакьалу ву.
Аьхиримжи йисари Дагъу-стандиъ жюрбежюр шагьрариз, жара уьлкйириз кагъзар, посылкйир гъахру тешкилатар ачмиш дапIна. Амма жара тешкилатар ачмиш духьнашра, Урусатдин почтайин гъазанжариз дурарихьан тясир апIуз шуладар. Гъубху оптимизацияйиз ва ляхниъ технологияйин цIийи мумкинвалар ишлетмиш апIбаз дилигну, почтайин гъуллугънахьна илтIикIру муштарйирин кьадар артухъ дубхьна.
Уьлкейин гъулариъ почтайин отделенйир къайдайиз хпан гьякьнаан Урусатдин Президентдин вуйи табшуругъар тамам апIури, Дагъустандиъ 2022-пи йисан эвелариан мина гъийин йигъазкьан гъулариъ айи почтайин аьлакьайин 100-дилан зиина объектар (гьадму гьисабнаъди Табасаран ва Хив районариъ) рас дапIну, къайдайиз духна. Думу модернизацияйин программа 2026-пи йисазкьан давам хьибди.
Маважибарикан улхуруш, «Урусатдин почта» АО-йин генеральный директори, почтайин аьлакьайин отделенйириъ лихурайидарин маважибар за апIбан бадали, ноябрин вазлилан башламиш дапIну, 4 миллиард манат жара апIбан гьякьнаан къарар кьабул дапIна ва почтайиъ лихурайидарин маважиб 2025-пи йисандин МРОТ-дихъна адапIбанди ву», – гъапнийи Зейнудин Рамазановди.
Ихь уьлкейиъ «Урусатдин почта» гьюкуматдин компания ву. «Урусатдин почтайи» маркйир карсра, аьхюну пай кагъзар ва открыткйир гъахура, почтальонари яшлуйириз пластикдин картйир дарди пенсияйин пул хура. Имбу компанйир почтаси гьисаб апIуз шулдар, дурар муштарйирин гъуллугъар ву. Муштарйирин гъуллугъари багьади вушра, кагъазра, чIатху посылкара ухди гъабхуру, амма дурариз гьюкуматдин ихтиярар цIибтIан адар. Гьаци вушра, дурарихьанра Варидюн’яйин почтайин йигъ къайд апIуз шулу.
«Табасарандин нурар» газатра «Урусатдин почтайин» почтальонари гъулариз гъабхуру. Дурарин ляхникан учу разиди даршра, почтайин аьлакьайин йигъ тебрик дарапIди гъитуз шулдар. «Урусатдин почтайин» республикайиъ лихурайи гъуллугъчйириз Варидюн’яйин почтайин йигъ тебрик апIури, мюгькам сагъ’вал, ляхниъ хъуркьувалар, ужудар маважибар ккун апIурача.
