Зубайдат Шябанова
Табасаран райондин Ярса ва Зил гъулариъ штун месэла учIруди дийибгъну магьа хьудпи йис гъябгъюра. Месэла учIру дубхьнайивал вари йишвариъси ухьухьра нирариъ штар кьит шулайивалихъди, булагъар уркърайивалихъди аьлакьалу ву. Хайлиндари гъулан булагъдиз гъюрайи штарикан чпин хулариз шид гъизигну. Гьаму себебариан аьхю гъул шид адарди гъубзра. ИкибаштIан, гъуйи айивали хайлиндариз кюмек шула. Хъа бязи хизанари убхъру шид гъунши гъулариан машинариъди хура.
Ярса гъулан поселениейин кIулиъ айи Аьбдулмажид Шябановди ич сюгьбатнаъ къайд гъапIганси, Ярса ва Зил гъулариъ штухъди аьлакьалу месэла гьял апIуз поселениейин улихьдин глава Аьбдулла Аьбдуллаевди гъайгъу гъизигну.
«Аьбдулла Аьбдулгьюсеевич-диз ич поселениейин гъуларин вари агьалйирин терефнаан аьхю чухсагъул. Му гьюрматлу касди гъулариз шид зигбан проект гьяракатнаъ ипуз вари мумкинвалар ва кьувватар жалб гъапIну. Магьа багарихьди штуз ккилигурача. Уву фикир апIин, хьадан лап мани йигъан чюлиан мал-къара гъулаз латариина шид убхъуз гъюру. Дурар сяътариинди ичIиди айи латарилан илдицури гъузру. Шид адарди гъулаъ 4-5 йис ву. Гележегдиъ, шид кьяняаьтлуди ишлетмиш апIури гъабхьиш, инсанаризра, мал-къарайизра, хярар-хутIларизра гьубкIди.
Узу гъуландариз резервуарар масу гъадагъай кIури, теклиф дивназа. Аьхюну пай агьалйири гъадагъну. Резервуариъ шид уч гъабхьиган, думу кьяняаьтлуди ишлетмиш апIуз шулу. Штун цIийи турбйирикан хусуси хулариз шид зигуз саризра ихтияр тувдарча. Мидланра гъайри, штун месэлайиз лигру сар кас гъуллугъназ гъадагъуз планарик кайич. Думу касди ихтияр дарди турбайикан шид зигуз гъитидар, турбйирин аварийный аьгьвалатназ ва шид варидариз гьубкIрувализ лигиди», – гъапнийи Аьбдулмажид Шябановди.
Штун турбйир зигбан ляхнар аьхирихъна гъюра. Улихьна йигъари думу гъайгъушнарихъди таниш хьуз Табасаран райондин глава Мягьямед Къурбанов, РД-йин Халкьдин Собраниейин депутат Алавудин Мирзабалаев подрядчикарин ва заказчикарин вакиларра хъади йишв’ина гъушну.
Зил ва Ярса гъулариз шид хурайи гъурулушди марцци убхъру штухъди 400-тIан артухъ хизанар тямин апIиди. Му гидротехникайин цирклиан лап аьхю ва кьувватлу гъурулушдин дахилнаъ шид уч апIру швнуб-саб йишв, каптажный камера, шид марцц апIру ва насосдин станцйир а. Саб суткайиъ уч шулайи штун кьадар 200 тоннайихьна хьибди. Ярса ва Зил гъулариз шид гъуларихьан 14 километр манзилнаъ айи «Шах-шах» кIуру йишван булагъариан шубуб циркил кадабгъну хура.
Мягьямед Къурбановди ва Алавудин Мирзабалаевди, яшайишдин аьхю мяна айи месэла фила гьял дапIну ккудубкIуруш, заказчикарихъди ва подрядчикарихъди сюгьбат гъапIну. Дурарин гафариинди, ляхнар октябрин аьхириз ккудукIиди.
