Умгьанат Сулейманова
Ад бадали кIурадарза му гафар –
Читин кеспнахъ хъайидар ву мялимар,
Жигьил насил дугъри рякъюъ аърудар,
Илмин вилаятдиз раккнар тIаърудар.
Гьярфнахъди гьярф, гьибарси, уч апIури,
Улупнийхьуз мялимди китаб урхуз.
Гьялак дарди, сифте цIарар зигури,
БикIуз улупуб жафа ву кьадарсуз.
Жигьил наслиз аьгъювалар, тербия
Тувру аку, жумарт ужагъ ву мектеб.
Мялимари ухьухъ гьизигу жафа
Йисар гъягъбан кьяляхъ шулуки аьян.
Йиз мялимар, кIурза учвуз чухсагъул,
Афериндиз лайикьлу ву ичв гъайгъу.
Уьмриъ ужуб ва харжиб жара апIуз
Ичв жафайи гьякьди улупну узуз.
ДуртIларин Идаят
Мялим кIуру гаф ухьу гьаммишан аьхю гьярфналан дибикIну ккунду. Думу гьарсар инсандин уьмриъ аьхю роль уйнамиш апIурайи, ихь гележегдин уьмриз аку раккнар тIаърайи кас ву. Мялим ихь гьарсарин хизандин гьацI пай ву, фицики бицIириз садпи ликар алдагъуз гъитрайидар, алабхьрубдихъди, ипIрубдихъди тямин апIурайидар абана баб вуш, дугъаз аьгъювалар ва тербия туврайидар мялимар ву.
Сентябрь вазли Табасаран райондин 95 йисандин юбилейин серенжемар къайд апIурайи вахтна республикайин кIулиъ айи Сергей Меликовди райондин образованиейин цирклиъ хайлин йисари намуслу ляхин апIурайи шубур касдиз – Жулжгъарин кьялан мектебдин мялим Аьлимягьямед Аьшурбеговдиз, Рушвларин кьялан мектебдин мялим Аьйшат Ибрагьимовайиз ва Къужникарин кьялан мектебдин мялим Аьбдуллагь Мягьмудовдиз «Дагъустан Республикайин лайикьлу мялим» ччвурар тувнийи. Гъи газат урхурайидар му мялимарин ляхнихъди таниш апIуз ккундучуз.
Бабкан наан гъахьнуш, гьадушваъ ярамиш гъахьну кIуруганси, Аьйшат Къазиевна Ибрагьимова Рушв’ил гъулаъ бабкан гъахьну ва душваъ дугъу 35 йисан мялимвалра гъапIну. Му кас гъулан жямяаьтдин, аьхюдарин ва бицIидарин арайиъ аьхю гьюрмат ва ужуб аваза айи кас ва мялим ву. Мектеб ккудубкIну, 1985-пи йисан думу Дербент шагьриъ педучилищейик урхуз кучIвру. Училище ккудубкIну гъулаз гъафи Аьйшат Рушвларин кьялан мектебдиъ пионервожатыйди ва табасаран чIалнан дарсар киври мялимди лихуз хъюгъру. Хьуд йислан, мялимвалин ляхин давам апIури, Аьйшат Ибрагьимова чан юкIв хъайи кеспнаан заан образование гъадабгъуз ният ади, 1991-пи йисан ДГУ-йин дагъустан филологияйин факультетдик заочно урхуз кучIвру.
Айшат Ибрагьимовайи дарс киврайи бицIидари гьаммишан райондин ва республикайин дережайин олимпиадйириъ сабпи, кьюбпи йишвар гъадагъури шулу. 2009-пи йисан дугъаз «ВаритIан ужур мялим» конкурсдиъ гъалиб хьпаз лигну, Президентдин грант тувну. Мялим дишагьли фунуб пешкешдизра лайикьлу ву, гьаз гъапиш дугъан йирфариин, хулан мяишатдин ляхнарси, мектебдиъ дарсар кивуб ва бицIидариз тербия тувувалра ал. Аьйшат Ибрагьимовайиз ва имбу табасаран дишагьлийириз – мялимариз кIваантIан аферин!
Аьшурбегов Аьлимягьямед Бай-рамбегович 1969-пи йисан Жулжагъ гъулаъ бабкан гъахьну. 1986-пи йисан мектеб ужудар аьгъювалариинди ккудубкIну, думу Мягьячгъалайиъ ДГУ-йиъ тарихдин факультетдик урхуз кучIвру. Вуз ккудубкIу жигьил пишекар сад йисан Хючнаарин кьялан мектебдиъ пионервожатыйди, хъасин Жулжагъ гъулаъ мялимди лихуз хъюгъру.
Аьшурбегов Аьлимягьямедра райондиъ ужуб ад айи мялим ву. Думу швнуб-саб ражари муниципальный конкурсариъ иштирак гъахьну. «Табасарандин йисандин мялим» конкурсдиъ 2000-пи йисан 2-пи йишв, 2008-пи ва 2015-пи йисари 1-пи йи-швар, «Йисандин варитIан ужур мялим» конкурсдиъ 2013-пи йисан 1-пи йишв гъазанмиш гъапIну. Дидланра савайи, кьюб ражари (2008-пи ва 2016-пи йй.) Урусатдин Президентдин грантдин сагьиб гъахьну. Думу «Признание 2012» милли премияйин лауреат, Урусатдин уьмуми образованиейин гьюрматлу гъуллугъчи, заан категория айи мялим ву. Аьлимягьямед Аьшурбегов, ляхниъ гъазанмиш дапIнайи заан хъуркьувалариз лигну, кьюб ражари Урусатдин образованиейин министерствойин гьюрматнан грамотйириинди лишанлу дапIна.
Командир фицир гъахьиш, эскрарра гьацдар хьиди, кIуруганси, дугъан хиликк урхурайи бицIидари кми-кмиди райондин ва республикайин держйирин конкурсариъ ва олимпидайириъ пешкешнан йишвар гъазанмиш апIуру. Мисалназ, анжагъ 2023-2024-пи урхбан йисан арайиъ дугъан 12 ученикди муниципальный олимпиадйириъ 12 пешкешнан йишвар, ва республикайин олимпиадйириъ 2 йишв гъазанмиш гъапIну.
Мягьмудов Аьбдуллагь Мягьмудович Табасаран райондиъ Къужник гъулаъ аьхю албагу хизандиъ бабкан гъахьну. 1995-пи йисан мектеб ккудубкIну, думу Мягьячгъалайиъ ДГУ-йиъ химияйин ва биологияйин факультетдик урхуз кучIвру.
Вуз ккудубкIбалан кьяляхъ, 2001-пи йисхъанмина Къужник гъулан кьялан мектебдиъ химия ва биология дарсар кивру мялимди лихура.
Аьбдуллагь Мягьмудовдира пишекарвалин рякъюъ хайлин хъуркьувалар гъазанмиш дапIна. 2016-пи йисан думу химияйин дарсар кивру мялимарин арайиъ вуйи олимпиадайин муниципальный этапди 1-пи йишв, хъа 2018-пи йисан гьадму олимпиадайиан республикайин этапдиъ 2-пи йишв, 2019-пи йисан биологияйиан Дагъустан мялимарин арайиъ вуйи олимпиадайиъ 2-пи йишв, 2022-пи йисан мялимар-предметникарин арайиъ гъабхьи «Профи-2022» олимпиадайиъ 3-пи йишв гъазанмиш гъапIну. «Дагъустандин химияйин дарсар кивбаан варитIан ужур мялим» конкурсдиъ Аьбдуллагь Мягьмудов 2018-пи йисан 3-пир гъахьнийи, хъа 2019-пи йисан думу Дагъустандиъ варитIан ужудар мялимарин сиягьнаъ гъадагъну. Урусатдин Федерацияйин мярифатнан ва тербия тувбан гьюрматлу гъуллугъчи, заан категория айи мялим ву.
Аьбдуллагь Мягьмудовди дарс киврайи баяр-шубарира, райондин, республикайин олимпиадйириъ иштирак шули, ужудар натижйир улупура.
Мялимвал, узу зиихъ гъапиганси, рягьти пише дар, ва дидиъ лихурайидариз, фукIа дарди, гьюрматнан ччвурар тувудар. Йиз макьалайин игитар вуйи шубрид мялимарра заан гьюрматназ лайикь ву. Ва табасаран шаир ДуртIларин Идаятдин гафарихъди хъипри, жигьил насил бадали апIурайи дурарин ляхниз аьхю аферин кIураза.
