Мейлан Нежефов

Хив райондиъ Хизандин йисаз тешкил дапIнайи «Адаш, дада ва узу – кьавларин хизан» кIуру ччвур тувнайи конкурс кIули гъубшну.

 

Натижайиъ сабпи йишв кьюб гъулан культурайин гъуллугъчйири гъадабгънийи: Мажвгларин гъул’ан вуйи Жалиловари ва Асккан Ярккан вуйи Керимовари. Кьюбпи йишв гъибисдар Ляхлаарин гъулан агьалйир Маллаевар ву, хъа шубубпи йишваз кьюб гъулан вакилар лайикьлу гъахьну: Асакент гъул’ан вуйи Аьлиевар ва Кашкент гъул’ан вуйи Цмиеварин хизан.

Конкурс гъабхбан метлеб ва думу фици кIули гъубшнуш, Хив райондин культурайин, спортдин, жигьиларин политикайин ва туризмдин отделин кIулиъ айи Казбек Къазиевди ктибтну.

«Ав, ухьуз мялум вуйиганси гъябгъюрайи йис ихь уьлкейиъ Хизандин йис ву. Гьарсар касдиз хизан варибдин эвел, бина ва даягъ ву. Конкурсдин асас мурад-метлебра иштиракчйирихьди гьадму гьаци вуйиб гьисс апIуз гъитувал вуйиз. Чухсагъул сифте конкурс кIули гъабхуз кюмек туву райондин администрацияйиз, хъасин гъулариан иштирак гъахьи культурайин хуларин гъарашугъариз ва мектебариъ урхурайи баяр-шубариз. Сабсана пуз ккундузуз. Гъи багъри бабан чIалариинди улхуб ихь арайиан кьит шулайиган, му жюрейин конкурс жвуван (табасаран ва лезги) чIалариинди гъабхуб хъанара ужуйи гъабхьну. Йиз фикриан, конкурсдиз тамаша апIуз гъафи райондин агьалйирира аьхириъ ликри дугъужвну гарччлар гьаддиз гъивнийи», – къайд гъапIнийи Казбек Къазиевди.