28-пи февралиъ Хив райондиъ муниципалитетдин администрацияйин нубатнан коллегия кIули гъубшну. Заседание 2018-пи йисан ватандашариз армияйиъ гъуллугъ апIуз дих апIбан натижйириз ва райондин аьтрафариин армияйиъ гъуллугъ апIуз гъягърудар гьисабназ гъадагъбан аьгьвалатназ бахш дапIнайи.
Серенжемдиъ доклад хьади удучIвну гъулху Хив ва Агъул районарин военком Пирмягьямед Къубачевди, чпи гъубху ляхникан хъайи-хъайиси ктибтну.
«Гъуху серенжемари райондин вари ватандашар армияйиъ гъуллугъ апIуз гъягъбан гьисабназ гъадагъну адрувал улупну»,
– къайд гъапIну П.Къубачевди.
Му месэлайин гьякьнаан вахтназ вуди Хив райондин главайин вазифйир тамам апIурайи Агъамирзе Гьямзабеговра, райондин администрацияйин идара апIбан ляхнариз лигру Арсен Рамазановра удучIвну гъулхну. Дурари ляхин дюзди тешкил апIбан важиблувал къайд гъапIну.
