Зубайдат Шябанова
Гьаму йигъари Мягьячгъала шагьриъ 2010-2011-пи йисарин живанарин арайиъ волейболиан Дагъустан Республикайин сабпи йишваз вуйи талитар гъахьну.
Талитариз республикайин варитIан ужударстар 6 команда удучIвну. Дурар Табасаран, Хунзах, БутIлих, Леваши районарин ва кьюб команда Мягьячгъалайиндар вуйи. Табасаран райондин терефнаан талитариз бицIидаринна живанарин 3-пи нумрайин спортдин мектебдин (ДЮСШ-3) баяр гъушну.
Вари командйир кьюб дестейиз жара гъапIну. А дестейиъ – БотIлих райондин, Хунзах райондин ва Мягьячгъала шагьрин 2-пи нумрайин командйир, хъа В дестейиъ – Табасаран райондин, Мягьячгъала шагьрин 1-пи нумрайин ва Леваши райондин командйир айи.
Табасаран райондин командайи сабпи талит Мягьяч-гъалайин командайихъди гъубхну ва 2:0 гьисаб ади гъалиб гъахьну. Леваши райондин командайиинра ихь живанар гьадму гьисаб ади (2:0), гъалиб духьну дестейиан удучIвну.
Полуфиналиъ ихь волейболистар Хунзах райондихъди бягьсназ удучIвнийи. Мушваъра дурари 2:0 гьисаб ади, талит аьхирихъна гъабхну. Финалиъ 0:2 гьисабниинди, БутIлих райондин команда гъалиб гъахьну.
Талитарин натижйириинди, 1-пи йишв БутIлих райондин, 2-пи йишв Табасаран райондин, 3-пи йишв – Мягьячгъала шагьрин 1-пи нумрайин командйири гъидисну. Гъалибчйир ва пешкешнан йишвар гъадагъдар кубокариинди, медалариинди ва грамотйириинди лишанлу гъапIну.
Табасаран райондин спортдин мектебдин директор Садикь Уьсмановди ич сюгьбатнаъ къайд гъапIганси, Табасаран райондин сборный командайин дахилнаъ шубур Хючна, кьюр Дагъни, сар Хьарагъ, сар Рушвул ва сар Гьисихъ гъулариан вуйи баяр а.
«Командайиз варитIан гъагъи талит, гъалибвализ дилигди, Хунзах райондин сборныйихъди гъабхьну. 2:0 гьисаб гъабхьнушра, партйир 26/24 ва 28/26 очкйириина улдучIвнийи. Финалиин рази дарза. Гьаз кIурава гъапиш, ихь командайиз сабпи йишв гъадабгъуз мумкинвалар айи. Аьгъдарзуз, ихь команда чашмиш гъахьнуш, даршиш жвуван мумкинвалариин инанмиш вуди, айи кьувват тамамвалиинди улупундарш. Саб гафниинди, йисар гьюдюхюрайи баяр-шубар ву. Хасиятар гьюдюхру йисарин живанарихъди ляхин апIуз цIиб гъагъиди шулу. Амма ухьу, сабдизра дилигди, ляхин гъабхурхьа. Сабпи йишван пьедесталиина ухьу удучIвру йигъра улубкьиди», – гъапнийи ДЮСШ-дин директор Садикь Уьсмановди.
Живан волейболистар тебрик апIури, дурариз гележегдин талитариъ шлу гъалабваларин инанмиш’вал ашра, вари мумкинвалар ишлетмиш апIури, хъана заан хъуркьувалар гъадагъуб ккун апIурача.
