Мейлан Нежефов
Халис шаир уьмриан душну саб флану вахт улдубчIвнушра, дугъкан халкь ктIатIарццри улхуру. Гьацдар дилавар мелз айи шаирарикан сар ву Абумуслим Жяфаров.
Советарин деврин табасаран литературайин ккиришрар ккиву шаир, драматург, прозаик Абумуслим Жяфаров, Хив гъулаъ бабкан духьну, 115 йис тамам гъабхьну. Шаирин гьюрмат уьбхюри, 22-пи октябри Хиварин гъулан культурайин хулаъ А. Жяфаровдиз бахш дапIнайи серенжем яркьуди кIули гъубшнийи.
Литературайин вечериъ «Да-гъустан дишагьли» журналин кIулин редактор, РД-йин писателарин Союздин табасаран секцияйин секретарь Сувайнат Кюребегова, «Ппази» журналин редактор Феруза Султанова, «Литературайин Табасаран» журналин мухбир Шюшеханум Керимова, «Табасарандин сес» газатдин жавабдар секретарь Аьбдулмежид Къурбанов, «Табасарандин нурар» газатдин мухбир Мейлан Нежефов, бабан чIалниинди удубчIвурайи «Мил» передачайин редактор Мягьямед Гьюсейнов, райондин образованиейин отделин заместитель Азадин Юсуфов, шаирар Гьяжимягьяммед Гьяжиев, Аьбдулмежид Рашидов, Кюребег Мурсалов, ДуртIларин Идаят, Гьюсейн Гьюсейнов, райондин мектебарин, культурайин ва библиотекйирин гъуллугъчйир ва гьацира урхурайидар иштирак гъахьнийи.
Гьюрматлу шаирикан ктибтури гьарсар удучIвну улхурайири дугъан саринубдизра ухшар дару бикIбан хатIнакан, сазандарваликан, эсерарин тIяаьмнакан улхури, аргъаж шулайи насларихьна илтIикIури, дурарикан А. Жяфаровдихьна вуйи гьюрмат ва дугъан эсерариз вуйи кьимат дудрубгуб ккун гъапIнийи.
Бажаранлу шаирин уьмур фукьан вушра кьутIкьлибра гъабхьну… Дугъан «ДарчIиди кивур», «Эреллер», «Уьмур бадали», «Накьвдиъ концерт» таниш дару ксар ихь ватанагьлийирин арайиъ бажагьат ашул.
Дугъан яратмиш’валарин сиягь вари ктудухишра, анжагъ саб «Табасаран» шиъриинди ухьуз думу нумуна шула. Шаирин гьадму ва саб жерге жара шиърариз дидикIнайи мяълийириинди ихь устадар Сефьяханум Муртазаевайи, Нурудин Аьбдуллаевди ва Адият Гьямзаевайи серенжем хъана уткан гъапIнийи.
Къайд апIуз ккундузуз, му серенжемдиъ райондин мектебариъ урхурайидари уч духьнайи гьарсар касдин кIваз тясир тувруганси, шаирин шиърар гъурхнийики, Дугъриданра, шаир гъийихъанминара 115 йисанса фикриъ гъузрур вуйиб субут апIуз шулу.
