Гюльнара Мягьямедова
29-пи октябри Сергей Меликовди гизаф махлукьат иштирак шлу серенжемар гъахурайи йишвариъ транспортдин инфраструктурайин объектариъ хатIасузвал тямин апIбаз бахш дапIнайи совещание кIули гъубхну. Душваъ инсанар гизаф уч шлу йишварихь, важиблу объектариин, рякъяриин, транспорт дебккру йишварихь видеойин гюзчивал тешкил апIбакан гъапнийи.
Республикайиъ «ХатIасуз шагьур» кIуру аппаратурайин программайин комплексди ляхин апIура. Дидин кюмекниинди гъубшу йисан саб миллиондилан зиина къанун чIюбгърудар гьисабназ гъадагъну.
Совещаниейиъ Сергей Меликовди гъапиганси, улихь дийибгънайи месэлайин важиблувализ дилигну, образованиейин, сагъламвал уьбхбан, транспортдин инфраструктурайин объектар сабпи йишв’ин дерккну, хатIасузвалин гъурулуш артмиш апIбаз мумкинвалар дагну ккунду.
Региондин кIулиъ айири гьар йигъан республикайиъ шулайи аварйирикан, рякъюнна транспортдин хатIалу дюшюшариъ зийнар шулайидарин ва йихурайидарин кьадар артухъ дубхьнайиваликан гъапнийи. Гьелбетда, думу цифрйири ухьу пашман апIура.
Гьамусяаьт республикайин рякъяриин, транспортдин гьяракатнан къайдйир чIур апIувал гьисабназ гъадабгъури, стационарин, мобильный ва саб йишвлан тмуну йишв’ина гъахру фотовидеофиксацияйин 419 гъурулуш ляхник кирчна. «Рякъяриин дивнайи камерйирин кюмекниинди ухьу къайда чIур гъапIдар жавабдарваликкан ккудучIвуз гъитрадархьа. Йиз фикриинди, видеокамерйир рякъяриъ хатIасузвал тямин апIбан ужудар кюмекчйир ву», – гъапнийи совещаниейиъ Сергей Меликовди.
«Урбантех ТТ» компанияйихъди йитIнайи йикьрариз асас вуди, республикайин рякъяриъ стационарин 200 комплекс дивуб планламиш дапIна. «СКОБЖ» предприятиейи стационарин 300 комплекс дивуб ва пилот адарди тIирхру аппаратарин бинайиин 10 мобильный комплекс ишлетмиш апIуб планламиш апIура. Улихьнаси дивнайи 223 комплекс цIийи алаъбан месэлара улихь дийибгъна.
2023-пи йисан региондин машинар гъягъру рякъяриъ 38 камерайикан ибарат вуйи анализ гъабхру ва видеомониторингдин гьисабар гъахру гъурулуш дивнийи. Думу гъурулуш «ХатIасуз шагьур» комплексдин дахилназ гъадабгъна, ва диди къанун уьбхру органарин вазифйир тамам апIура.
МЧС-дин терефнаан «ХатIасуз шагьрин» дахилназ 7 чукI ишлетмиш’вализ тувна.
Мягьячгъалайиъ, Дербентдиъ, Каспийскдиъ, Къизилюртдиъ гизаф инсанар ва транспорт уч шлу йишварихь инсанарин машар аьгъю апIру, гьюкуматдин регистрацияйин лишнар улупру, уьмуми видеосиягьятчивал гъабхру 218 камера дивна. Гьадрари варидари тахсиркарвалар ва къанун чIур апIувалар ашкар апIуз кюмек тувра.
Гележегдиъ жямяаьтдин варитIан гизаф гъягъюб-гъюб айи 364 объект ахтармишар гъахру сяняаьтарихъди тямин апIиди.
