Мейлан Нежефов

Магьа ццийин чвлин призыв худнаъ абхъна. Аьдат вуйиганси, думу 1-пи октябриан 31-пи декабризкьан давам хьибди. 25-пи октябри призывдин дахилнаъди Хив райондиан армияйиз 8 баликан ибарат вуйи сабпи десте рякъ’ин гъапIнийи.

 

Чпин ватандаш’валин буржи тамам апIуз гъягъюрайи жигьиларин улихь райондин глава Ярмет Ярметов, Хив ва Агъул районарин дявдин комиссар Сулейман Гьюсейнов, абйир-бабар ва багахьлуйир, мани ва ватанпервервалин гафар хьади, удучIвну гъулхнийи.

Бай рякъюъ тIаърайи Ферзуллагь Къачабеговдихъди гаф-чIал гъапIнийза ва дугъхьан, фицдар хиялар ади бай армияйиз гьаъраш, гьерхнийза. Дугъан кьатI’и жаваб исихъ тувраза. «Аьхю уьмриз сабпи гамар алдагъурайи баяриз Аллагь кюмек ишри. Йиз бай улихь хьади варидарикан ккун апIурайиб анжагъ саб вуйиз: чпин игит аьхю абйириз ва гьацира гьамусяаьт хусуси метлеб айи дявдин операцияйиъ жюрэтлувал улупурайи чвйириз гаф гъюруб дарапIуб. Наан ва фициб аьгьвалатнаъ гъахьишра, чиб дурарин ифдин цIадликан кайи худлар ва чвйир вуйиб кIваинди гъибтуб. Му гьиссар кIваъ уьрхюри, улупнайи сад йисандин чпин буржи намусниинди тамам апIуб дурарикан тIалаб апIураза. КIулди йиз балкан улхруси гъабхьиш, кIарза: армияйин кьяляхъ дугъу контрактдиинди гъуллугъ апIувал ктабгъурза ва Ватандиз гъуллугъ апIбаз йиз уьмур бахш апIурза гъапиш, дидизра къаршу хьидарза. Я Аллагь, вари дюн’яйиъ мясляаьт ва ислягьвал ибшри!»