Зубайдат Шябанова
Гьаму йигъари Табасаран райондин ТIивак, Дарвагъ, ТинитI, Куркакк, Халагъ, Хючна, Ягъдигъ ва Ярса гъуларин мектебариъ, хусуси метлеб айи дявдин операцияйиъ Ватандин маракьар уьрхюри, чпин жанар фида гъапIу 16 игитриз дурар кIваинди уьрхбан тахтйир арццбахъди аьлакьалу митингар кIули гъушну. Думу серенжемариъ райондин администрацияйин вакилар, жюрбежюр идарйирин гьякимар, гъийиху эскрарин хизанар ва багахьлуйир, гъуларин жямяаьтар, мялимар, мектебариъ урхурайидар иштирак гъахьну.
ТIивак гъулан кьялан уьмуми мектебдин цалик сабишв’инди шубур эскриз суратар айи тахтйир керхнийи. Дурар гьаму мектебдиъ урхури гъахьи Аьрабхан Амирасланов, Алавутдин Шихялиев ва Салигь Амирялиев ву.
Аьрабхан Амираслановди мектеб ккудубкIбан кьяляхъ, Мурманскдиъ контрактдиинди гъуллугъ гъабхури гъахьну. Гьадушв’ан эскер 2023-пи йисан хусуси метлеб айи дявдин операцияйиз гъухнийи. 2024-пи йисан 27-пи апрели нацистарихъди вуйи женгариъ Аьрабхан кечмиш гъахьну.
Алавутдин Шихялиевра армияйин кьяляхъ контрактдиинди Ростов шагьриз яракьлу кьувватарин жергйириз гъуллугъ апIуз гъушнийи. Думу хусуси метлеб айи дявдин операция ккебгъу садпи йигъарихъанмина йивбариъ иштирак шули гъахьну. Цци 9-пи июндин гъати женгариъ Алавудин кечмиш гъахьну.
Салигь Амирялиев 2023-пи йисан чан хушниинди СВО-йиз гъушну. 2024-пи йисан январь вазли думу душмнарин хил’ан гъакIну.
Хючна гъулан 1-пи нумрайин лицей ккудубкIу Аьгьмад Амирялиевди 2008-пи йисан Мурманский областдиъ гьюлин пияда кьушмариъ гъуллугъ гъабхури гъахьну. 2010-пи йислан 2024-пи йисаз думу республикайин МВД-йин ведомствйирин дару гъаравларин дестейиъ айи, гьадушв’ан Росгвардияйин жергейириз гъушну. Цци июндин вазли думу СВО-йиз гъухну, августдин 7-пи йигъан нацистарихъди вуйи женгариъ кечмиш гъахьну.
Ягъдигъ гъулан мектебдин цалик сад йигъан СВО-йиъ гъакIи кьюр эскриз тахтйир керхнийи. Дурар Набиюлла Мягьярамовдин ва Рамазан Рамазановдин суратар кайидар вуйи.
Набиюлла Мягьярамов контрактдиинди гъуллугъ гъабхурайир вуйи, хъа Рамазан Рамазанов СВО-йиз мобилизацияйин кампанияйин сиягьдик кахъну душнайир вуди гъахьну.
Куркакк гъул’ан вуйи Мягьямед Керимовдин гьюрмат уьбхбазра гъуландари фикир тувну. Куркакк гъулан мектебдиъ дугъу 5-пи классдиан 11-пи классдизкьан гъурхну. Мялимарин гафариинди, Мягьямед жавабдар, чахъди сабси урхурайи живанариз гьадмугантIан нумунади дерккуз шлур ва, аьгъювалар гъадагъбаъси, спортдиъра ужудар хъуркьувалар ва мумкинвалар айир вуди гъахьну. Мектебдин кьяляхъ Мягьямедди Дербент шагьриъ медицинайин колледж ккудубкIну. Армияйин кьяляхъ контрактдиинди зенитдинна ракетйирин кьушмариъ дивизияйин фельдшерди лихури гъузну.
Хусуси метлеб айи дявдин операцияйиъ дугъаз кьюб ражари гъагъи зийнар гъахьнийи. Амма Мягьямед, чан кюмек гьадушваъ лазим ву кIури, учв сагъ апIбан ва реабилитацияйин кьяляхъ СВО-йиз хътакури гъахьну. Донецкдин терефнаъ нубатнан женгариъ думу кечмиш гъахьну.
Вадим Гьяжибегов ва Агьмед Мирзакеримов ТинитI гъулан баяр ву.
Хусуси метлеб айи дявдин операцияйиз Вадим Гьяжибегов чан хушниинди гъушур вуйи. Чав айи подразделениейихъди сатIиди думу Донецкий область нацистарихьан азад апIру женгариъ иштирак гъахьнийи. Гъагъи женгариан сабдиъ Вадим кечмиш гъахьну.
Агьмед Мирзакеримовди Запорожский терефнаъ гъуллугъ гъабхури гъахьнийи. Му дирбаш эскрин игитвалиин, дугъан ватан ккунивалиин вари командование тяжуб духьнайи. Чахъди сатIиди хъайи эскрар нацистарин гюлйирихьан уьрхюрайи вахтна Аьгьмаддиз йикIру зийнар гъахьну.
ТинитI гъул’ан хусуси метлеб айи дявдин операцияйиъ 8 эскер кечмиш гъахьну. Дурарин варидарин суратар мектебдин цалик керхна.
Бухьнагъ гъул’ан вуйи Абзутдин Шиховди чпин гъунши Халагъ гъулаъ мектеб ккудубкIну. Абзутдин гизаф бицIидар айи хизандин ургубпи велед ву. Думу хусуси метлеб айи дявдин операцияйиз чан хушниинди гъушур вуйи ва дугъу Донецкий терефнаъ гъуллугъ гъабхури гъахьнийи. Абзутдин Шихов 2024-пи йисан 1-пи майди гъати женгариъ кечмиш гъахьну. Дугъаз шубур бай ва кьюр риш а.
Табасаран райондиъ гъийиху эскрарин суратар кайи тахтйир керхбан серенжемар гъягъюрайи йигъан Дарвагъ гъулан кьюбиб мектебарин гьяятарра инсанари арцIнайи. Магьа 1-пи нумрайин мектебдин цалик, гьадму мектебдин выпускник, аьхюну сержант Рамиль Султанягьмедовдиз кIваинди уьрхбан тахта ачмиш гъапIну.
Рамиль Буденновск шагьриъ контрактдиинди гъуллугъ гъабхурайи эскер вуйи. Думу 2022-пи йисан чпин подразделениейихъди СВО-йиз гъухну. 2024-пи йисан 18-пи июнди кечмиш гъахьну. Дявдин женгариъ улупу игитвализ лигну, Рамиль Султанягьмедов «Эскервалин игитвал» ва «Женгариъ тафавутлу хьпаз лигну» медалариинди лишанлу гъапIнийи.
Дарвагъ гъулан 2-пи нумрайин мектебдин выпускник Шамиль Ферзялиев армияйин кьяляхъ, 2013-пи йисан, контрактдиинди яракьлу кьувватарин жергейиъ гъуллугъ апIури гъузру. Чан частнан дахилнаъди дугъу хайлин йисари Афгъанистандин сяргьятариин Таджикистандиъ СНГ-йин жилариин ислягьвал уьбхюри гъахьнийи.
Хусуси метлеб айи дявдин операция ккебгъган, дурарин подразделение Украинайин нацистарихьан Донбассдин агьалйир азад апIбаъ иштирак хьуз гьаъру. Думуган аьхюну лейтенант Шамиль Ферзялиев мотострелковый взводдин командир вуйи. 2024-пи йисан апрель вазли думу ДНР-ин Авдеевка шагьур азад апIбан женгариъра иштирак гъахьнийи. Зийнар духьнайи чан дуст гюллйириккан ккадагъурайи вахтна, нацистари дугъ’ина гюлле уьлюбхюру. Женгариъ улупу игитвалариз лигну, Шамиль Ферзялиевдиз кьюб ражари Кьягьялвалин орден тувну. Шамили кьюр велед гъитну гъушну.
Ярса гъулан мектебдин цалик хусуси метлеб айи дявдин операцияйиъ Ватандин азадвалихъан ва сариканра асилу дару ислягь уьмрихъан чпин жанар гьяйиф дарапIу 10 игит эскрин суратар ккерхна. Дурарикан юкьуриз – Рафим Селимовдиз, Сергей Зейфуллаевдиз, Аьзиз Аьлибеговдиз ва Вадим Гьяжимягьмудовдиз – бахш вуйи тахтйир тазади ачмиш гъапIдар ву.
Гимийиин гъуллугъ гъабхурайи старшина Рафим Селимов военный гъуллугъназ 2022-пи йисан гъушур вуйи. 2024-пи йисан Донецкдин терефнаъ женгариъ кечмиш гъахьну.
Ефрейтор Аьзиз Аьлибегов 2022-пи йисан аьхириъ армияйиз гъухну. Армияйиъ мотострелковый кьушмарин дестейиъ Украинайин сяргьятарин багахь гъуллугънаъ айир нацистарин хил’ан гъакIну.
Аьхюнур сержант Сергей Зейфуллаевра 2011-пи йисан армияйин гъуллугънан кьяляхъ контрактдиинди гьадушваъ гъузру. 2022-пи йисан хусуси метлеб айи операция ккебгъиган, чан хушниинди дина гъушну ва 2023-пи йисан кечмиш гъахьну. Думу «Игитвализ лигну», «Эскервалин вафалувализ лигну» медалариинди лишанлу дапIна.
Ефрейтор Вадим Гьяжимягьмудов 2022-пи йисан мобилизацияйин серенжемариъди СВО-йиз гъухнийи. Дугъу Луганскдин Халкьдин Республикайиъ гъуллугъ гъабхури гъахьну.
Вари гьаму эскервалин гъуллугъ тамам апIури гъийиху игит баяр Кьягьялвалин орденариинди лишанлу дапIна.
Гьарсаб гъулаъ игитар кIваинди уьрхбан тахтйир ачмиш апIбан митингдиъ мялимари ва багахьлуйири гъийиху эскрарин уьмрикан, дурарин мектебдиъ урхури гъахьи йисарин хъуркьуваларикан, багъри халкьдин аьдатарихьна вуйи рафтарикан, ватанпересваликан ва игитваликан ктибтнийи. Райондин администрацияйин ва идарйирин гъуллугъчйири игит баяр тербияламиш гъапIу абйир-бабариз, гъуландариз, дурариз дарсар киву мялимариз чухсагъул мялум гъапIнийи.
Табасаран райондин глава Мягьямед Къурбанов му серенжемар гъахурайи йигъан ТIивак ва Хючна гъуларин мектебариз гъушну. Серенжемдин кьяляхъ, ич сюгьбатнаъ дугъу къайд гъапIганси, хусуси метлеб айи дявдин операцияйиъ кечмиш гъахьи баяри, Ватандин маракьар уьрхюри, чпин уьмрар тувну.
«Ухьу гьарсар эскер игитси кIваин уьрхюз буржлу вухьа. Дурар урхури гъахьи мектебариъ кIваинди уьрхбан тахтйир арццувал – му ихь эскрарин игитвалариз икрам апIури алдабгъурайи сабпи гам, гьюрматнан сабпи лишан ву. Дурар чпин мектебарин уьмурлугъ дамагъ вуди гъузру.
Кьюб кIуруб, гьаму жюрейин серенжемари игитарин гьунарар аьсрариз тарихдиъ уьрхюз, аргъаж шулайи наслин ватанпервервалин гьиссар ва рюгь уягъ апIуз кюмек тувру. Кечмиш гъахьи гьарсар ихь игит эскрин ччвур инсанарин мелзниин ва фагьмиъ гъубзбан бадали, ихь насли дурариинди дамагъ апIбан бадали, ухьу вари чарйир зигидихьа.
Табасаран халкь, дугъриданна, республикайин вари халкьарин арайиъ варитIан игит халкь вуди гьисаб апIура. Ухьуз Урусатдин 4 Игит ахьуз, гьацира варжариинди эскрар дирбаш’валин, эскервалин вафалувалин ва чпиз Кьягьялвалин орденар тувбиинди лишанлу дапIна. Швнуд-сад агъзур ихь эскрари гьамусяаьтра хусуси метлеб айи дявдин операцияйиъ ватандин маракьар уьрхюра. Дицисдар веледар тербияламиш гъапIу абйир-бабариз ва дурариз дарс киву мялимариз вари жямяаьтдин терефнаан аферин ва чухсагъул кIураза», – гъапнийи райондин кIулиъ айири.
