Мейлан Нежефов
Гъябгъюрайи йисан 18-пи ноябриан 22-пи ноябризкьан Хив райондин мектебарин 10-пи классариъ урхурайи 55 бали Дербент шагьриъ Гь. Б. Къазиаьгьмедовдин ччвурнахъ хъайи пишекарвалинна педагогвалин колледждин гьяятдиъ ерлешмиш дубхьнайи, жигьилариз дявдинна ватанпересвалин тербия туврайи «Авангард» кIуру центриъ аьгъювалар гъадагъну.
«Му гьяфтайин арайиъ учуз НВП-йин, ОБЗиР-ин ва физкультурайин дарсариъ гьуркIну туврайи цIийи аьгъювалар учу эзбер дапIну ва кIваинди гъитну ккунду. Фицики, закур армияйиз гъягъруган, му аьгъювалар эскервалихьна гьязурлугвалин шибритI хьиди. Хъа мушваъ тасдикь апIурайиганси, армияйиз гъягъювал – гьарсар жили веледдин асас буржйирикан саб ву. «Авангард» центриъ, йигъан шубубан ипIруб туври, дахъуз-гъудужвуз ужуб марццишин айи общежитиера а, дарсариз лазим вуйи шей’ар ва палтар дилин чIанади тувначухьна. ГвачIнинган ухди гъудужвну, маш-хил дижибкIну, ушв гьибтбалан кьяляхъ дарсариъ шулча, хъасин, лисиндин чIив дапIну, тап мучIу хьайизкьан хъана дарсар давам шула. Хябяхъган общежитиейиз гъафири дадайин зенгариз жаваб тувраза (аьлхъюб кади). Учухь телефнар гъитри адар, ва гьаддиз дугъан юкIв фикрарик кади шулу. Мина гъяйизра армияйиз гъягъюб планарик кайиб вуйиз. Йиз чвуччву Урусатдин яракьлу кьувватариъ гъуллугъ апIбан контракт йибтIну, намуслуди чан гъуллугъ гъабхура. Хъа гьамусяаьт думу Украинайиъ хусуси мяна айи дявдин операцияйиъ иштирак шула. Дугъан медалари кабцIнайи мухри му ляхнихьна йиз гьевесра артухъ гъапIну. Хъа гьамус мушваъ аьшкь ва йиз кьувватариин хъугъ’вал имбубсан артухъ гъабхьнийиз», – машнакк инчI ккади ктибтура 10-пи классдиъ урхурайи Рафик Рустамовди.
«Баярикан ккунди айиб, анжагъ аьхюри гъапибдихъ хъебехъну, жвуваз гъапIу бирмиш-буйругъ тамам апIуб ва жвув аькьюллуди гъахуб ву. Гьюрматлу урхурайидар, учвкан ккун апIураза, ичв мектебдиз, райондин администрацияйиз гаф гъюруб мапIанай», – буйругъ тувнийи баярихъанди жавабдарвал гъабхурайи образованиейин отделин начальникдин тербияйин ляхнариз лигру заместитель Мягьямедшериф Садикьовди.
КIваин апIуз ккундузуз: 10-пи классдиъ урхурайи гьарсар балин анкета абйир-бабари, ОБЗиР-ин дарсар киврайи мялимари, классарин руководителари ва мектебариъ директорарин тербия тувбан ляхин кIули гъабхурайи завучари гьяфта улихьна гьязур дапIнайи. Дидихъди сабси райондин ЦРБ-йиан медицинайин справка, мектебдиъ дугъриданра 10-пи классдиъ урхура кIуру справка, классдин руководители хил’инди дибикIнайи характеристика, паспортдин, СНИЛС-дин ва метрикайин копйир лазим вуйи. Гьарсар урхурайирин анкета вахтниинди гьязур дапIнайивализ лигну, баяр, саб улхуб-рахубра адарди, кьабул гъапIнийи.
