Мейлан Нежефов

Гьар йисан ноябрин аьхирариъ гьавйир дигиш хьуз хъюгъюбси, мал-къара уьбхюрайи касар, чарвйирин сюрйир ва маларин лижар дапIну, дурар кьюрд адапIуз галариз хъаъну гъягъюру.

 

Магьа Хив райондин агьалйирра, гъулариан галариз гъягъюри, гьяракатнаъ а. Гьаз гъапиш райондиъ аьхъюшнар улуркьбахъди сабси, бязи гъуларизди сабпи йифра кмиди ктубгъну.

Аьдат вуйиганси, гьарсар касди чан маларик, чарвйирик, иб кадабтIну, ясана иб’ан урхъ идипну, шир кадатну, лишнар каъна – закур йигъан марччли ччил, хюнди кIари гъабхиган, гъуни-гъуншдихъди, гъулажвувахъди наразивалар дархьуз. Сабсана ужуб аьдатнакан дарпиди кьара гъюрдариз: мал-къара гьамци лижаъ айиган, варибдиз рягьят ву. Кьюрдун эвелиан аьхиризкьан сар касдихьан галиъ гъузуз шлуб дар. Хъа нубат ади, сумчир-салам гъабхьиган, сар-сариз ккюгъну, гъавриъ ва арайиъ сир-мясляаьт айиган, гьарсаб ляхин улихь гъябгъюру.

Гъит габнариз марччари кьюдюхрар ччилар, хъа хюнйири йици кIарар хури. Худайиканра эвел апIуз даршлукьан никкар-ччимар, масар-нисар хру берекетлу ва анжагъ гьамци хайирлуди бизар шлу кьюрд ккун апIурхьа.