Зубайдат Шябанова
20-пи ноябри Табасаран райондиз РД-йин правительствойин бицIи десте гъафну – Дагъустан Республикайин ЖКХ-йин инспекцияйин кIулиъ айи Сергей Касьянов ва образованиейинна илимдин министр Ягь’я Бучаев. Касьяновди Хючна гъулан 1-пи нумрайин лицейиъ урхурайи баяр-шубариз «ЖКХ-йин вилаятдиз сиягьят» темайиан классдин дарс-сюгьбат гъубхну, хъа Бучаев муниципалитетдин уьмуми образованиейин мектебарин директорарихъди совещаниейиъ ва Хянягъ гъулаъ футболин бицIи майдан абццбан серенжемдиъ иштирак гъахьну.
ЖКХ-йин вазифйир ва маракьар
Сергей Касьяновди мектебариъ урхурайидарихъди «Саб вуйи Урусат» партияйин «Аьгъювалар айи муштарйирин мектеб» проектдин дахилнаъди ЖКХ-йин месэлйириан дарс гъубхнийи. Баяр-шубариз ЖКХ-йин цирклиан вуйи презентация улупури, дугъу ЖКХ-йин тарихдикан, му цирклин месэлйирикан ва вазифйирикан, дидин асас паярикан ва ЖКХ-йин цирклин пишйирикан ктибтну.
Сергей Касьяновди гьацира штухъди, электроэнергияйихъди вуйи тяминваликан, яшамиш шлу хуларин техобслужеваниейикан, коммунальный дакьатар ишлетмиш апIбан гьисабарин гъурулушдикан сюгьбат гъубхну, ТКО-йин месэлйирикан, урхурайидар гъавриъ шлуси, ктибтну. Дидланра савайи, Касьяновди ЖКХ-йин гъурулуш мянфяаьтлуди либхуз ва артмиш хьуз гъитрайи инженерарин, электрикарин, сантехникарин ва идара апIру гъуллугъчйирин пишйирикан маракьлу мялуматар тувну. Дугъу, му пишйир гъадагъбахьна урхурайидарин гьевес жанлу апIури, гъи думу цирклиъ лихурайидарин заан маважибарин кьадарра ачухъ гъапIну.
«Гъийин дарсну му важиблу цирклиан ичв аьгъювалар артухъ апIуваликси, учвуз ЖКХ-йин артмиш’валик пай кивру пишйир гъадабгъбахьна гьевес артухъ апIуваликра миж кивуз ккундузуз. ЖКХ – му саб кьадар игьтияжар гьуркIрайи ва тамам апIурайи йишв вуди, думу ихь уьмрин, яшайишдин асас бина гьисаб шула. Ва иллагьки учв’лан, гележегдин наслилан, ихь хулан, гъулан, шагьрин гъайгъушнар асиллу ву», – гъапну аьхириъ РД-йин Госжилинспекцияйин кIулиъ айири.
Дарснан кьяляхъ узу думу дарс тешкил гъапIу 1-пи нумрайин лицейин директорин тербияйин цирклиан вуйи заместитель Фарман Аьзизовдихъди сюгьбат гъубхнийза. Дугъу къайд гъапIганси, республикайн ЖКХ-йин руководителин дарс гизаф мянфяаьтлуб, маракьлуб ва важиблуб гъабхьну.
«Учу мектебариъ урхурайидариз улихь-кIулихь хьайи ва гъуллугъариъ айи касарихъди кми-кмиди гюрюшмишар тешкил апIури шулча. Мисалназ, улихьнаси райондин глава Мягьямед Къурбановдихъди, РД-йин Халкьдин Собраниейин депутат Алавудин Мирзабалаевдихъди, райондин прокурорин кюмекчийихъди ва хайлин жарадарихъди классдин сяътар гъухунча.
Сергей Владимировичди ктитурайи ва арайиз адагъурайи месэлйирихъ бицIидарси, душваъ айи жигьил мялимарра лап дикъатлуди хъебехъну гъахьну, фицики гъи думу месэлйир ухьуз хулаъ, дуланажагъдиъ алахьура. Презентацияра ужуб вуйи. БицIидари чпи гъавриъ даршулайи месэлйириан хайлин суалар туври, сюгьбат маракьлуди гъубшнийи.
Дюзди кIурза, ухьу асас вуди диндин, сагъламвалин ва жара темйириз артухъ фикир туврахьа, хъа гьамцдар месэлйириз, яна ЖКХ-йин ва жара важиблу темйиризра фикир тувну ккунду. Пише ктабгъбан месэлара метлеблуб гъабхьнийи. Инспектори урхурайидариз гъи республикайиъ фицдар пишйир гьуркIрадарш, ктибтнийи. Ихь бицIидар мектебдин кьяляхъ медицинайин, техникайин ва жара заан вузариз гъягъюра. Хъа гъи игьтияж айи сантехникарин, электрикарин ва жара ляхнар уьмрин пишеди ктагъурайидар лап кьит духьна. Госинспектори сюгьбатнаъ чан дустарин тажрубайан мисалар хури, гьадмукьан рягьти, вари гъавриъ ахърубси сюгьбат гъубхнийи. Хайлин дугъан дустар, аьдати колледжар ккудукIну, гъи чпин пишекарвалин цирклиъ ужудар аьгъювалар айи руководителар духьна. Хъа йигъан, чпиз классдин дарс лап кьабул гъабхьиваликан, гьамусдиз дурариз ЖКХ фу вуш аьгъдруваликан, дидин вазифйирикан деребхьуваликан кIури, узухьна швнур-сар урхурайир гъафну. Сари чаз сварщик хьуз ккуниваликанра гъапнийи. Хъа гьамусдиз думу инженер хьуз ккундузуз, кIурайир вуйи. Гьамцдар гюрюшар учу гележегдиъра тешкил апIурча», – гъапнийи Фарман Аьзизовди.
Тафавутлу гъахьидар
Гьадму йигъан РД-йин глава Сергей Меликовдин табшуругъниинди, РД-йин образованиейинна илимдин министр Ягь’я Бучаев Табасаран райондин глава Мягьямед Къурбановдихъди сатIиди, райондин образованиейин идарйирин кIулиъ айидарихъди гюрюшмиш гъахьну.
«Табасаран район образованиейин цирклиъ ужудар хъуркьувалар гъазанмиш дапIнайи, аьгъювалар ва тербия тувбан ляхниъ вари цIийивалар чпин ляхниъ сарпидарди ишлетмиш апIру, деврин тIалабариз вахтниинди фикир тувру ва ляхниъ айи камивалар вахтниинди арайиан адагъру директорарин дестейиинди тафавутлу шулайи чешнелу районарикан гьисаб шула.
Ихь уьлкейин гележег гъи мектебариъ партйирихъ хъайидарин хилиъ а. Ва чпин ляхнихьна жавабдарвалиинди янашмиш шули, дурариз дарс киврайи мялимдин роль аьхюб ву», – гъапну министри. Дугъу гьацира Дагъустандиан гьамусяаьт хусуси метлеб айи дявдин операцияйиъ уьлкейин маракьар уьрхюрайидарин арайиъ Табасаран райондин мектебар ккудукIу гизаф баяр айиб къайд гъапIну.
Гюрюшдиъ Ягь’я Бучаевди Табасаран райондин тафавутлу гъахьи мялимар пешкешариинди лишанлу гъапIну. Гьаци, Табасаран райондин гимназияйин мялим Лейла Къурбанова, хайлин йисари гъабхурайи баркаллу ляхниз лигну, Гьюрматнан грамотайиинди, Ягъдигъ гъулан 1-пи нумрайин мектебдин мялим Ниязи Аьзизов ва Куркакк гъулан мектебдин мялим Аьбдулкерим Керимов «Дагъустан Республикайин образованиейин отличник» ччвурниинди, ЦIийи Лижва гъулан мектебдин мялим Къунагъбег Абасов, Мягьрягъ гъулан 1-пи нумрайин мектебдин мялим Шергия Сафарбегова, Дарвагъ гъулан 2-пи нумрайин мектебдин мялим Ризахан Уружев «Дагъустан Республикайин образованиейин цирклин гьюрматлу насигьятчи» значок тувбиинди лишанлу гъапIну.
Гаф кIулиз адабгъну
2023-пи йисан Ягь’я Бучаев Табасаран райондиз образованиейин цирклин гъурулуш ахтармиш апIуз гъафнийи. Думуган министр саки вари райондин мектебариз, гьадму гьисабнаан Хянягъ гъулан мектебдизра гъушнийи. Гюрюшдиъ мялимарин коллективди мектебдин аьтрафариин футболин бицIи майдан дивбан месэла гъитIибкIнийи. Ягь’я Бучаевди му месэла гьял апIуз гъайгъу зигруваликан гъапну ва чан гаф кIулиз адабгъну.
Гьаци, 20-пи ноябри министр Ягь’я Бучаев, Табасаран райондин глава Мягьямед Къурбанов Хянягъ гъулаз футболин цIийи майдан абццуз гъушну. Серенжем ккебгъайиз, делегацияйи Урусатдин Игит Исрафил Мягьямедовдин ядигарихъ кюкйир дивнийи.
Футболин майдан тикмиш апIуз цци февралин вазли «Образование» федералин проектдин дахилнаъ айи «Гьарсар бицIирин хъуркьувалар» милли проектдиинди хъюгънийи. Гъи Хянягъ гъулан мектебдизра чан хусуси деврин майдан гъабхьну.
Ягь’я Бучаевди къайд гъапIганси, республикайиъ футболиан Мектебарин лига гьяракатниинди артмиш шула. Хъа гьаму жюрейин цIийи майднариин уйнамишар гъахували Дагъустандин мектебариъ урхурайи баяр-шубариз Урусатдин дережайиъра хъуркьувалар гъадагъуз мумкинвал тувди.
