Дагъустандин Огни шагьрин депутатарин собраниейи, варидари сабси сесер тувну, ихь ватанагьли Замир Гьяжимурадов шагьрин главади ктагъну.

Замир Шамсутдинович Гьяжимурадов 1985-пи йисан Хив райондин Гьяригъ гъулаъ бабкан гъахьну ва 20 йисантIан артухъ вахтна Урусатдин Яракьлу кьувварариъ гъуллугъ гъапIну.

Хусуси метлеб айи дявдин операцияйиъ сабпи йигъарихъанмина иштирак шулайи ва «Аьгьмат» батальондин командирин заместитель Замир Гьяжимурадов жюрбежюр медалариинди ва орденариинди лишанлу дапIна. Гьадрарин арайиъ Кьягьялвалин орден, «Жюрэтлувализ лигну» ва Луганск халкьдин республикайин «Гъуллугънан вафалувализ лигну» медаларра а.

Гьаму йисан июлин вазлихъанмина Замир Гьяжимурадов Дагъустандин Главайин насигьятчиди гъилихну. Эвленмиш духьна ва 4 велед тербияламиш апIура.

«Табасарандин нурар» газатдин терефнаан Замир Гьяжимурадов заан гъуллугънахъди тебрик апIури, дугъаз ляхниъ хъуркьувалар ккун апIурача.