Февралин 10-пи йигъан Дагъустандин Огни шагьрин администрацияйин глава Зейдуллагь Гьяшимовди гъубху совещание газдихъди ва электроэнергияйихъди тямин апIбан месэлайилан ккебгънийи.

 

 

 

Шагьрин администрацияйин кIулиъ айири агьалйирин чиб электроэнергияйихъди тямин апIбан гьякьнаан вуйи аьрзйир арайиз адагънийи.
Диспетчерин нубатчивалин гъуллугънан вакилин гафариинди, Сталиндин ччвурнахъ хъайи кючейиъ электроток адрувал Дербентдин райэлектросетарин гъурулушдиъ аварияйин дюшюшар хьувалихъди аьлакьалу вуйи.

Совещаниейиъ гьацира ТОСЭР-дин резидент хьуз ккуни инвесторариз тувру жилин участокдин 150 гектарин кIварар улупбахъди аьлакьалу месэлара гьял гъапIнийи.
Инсанариз даккун дубхьнайи, шагьрин аьтрафарилан зирзибил алдабгъбан месэлара гъирагъдиъ гъибтундайи. Подряддин тешкилат «Экологи-ка» фирмайин цIийи директор Мягьямед Гитиновди гаф тувнушра, шагьрин аьтрафарилан зирзибил алдабгъбан месэла гьял дапIну ккудубкIурадар.

Совещаниейиъ гьар йигъан хъархъас уч дубхьнайи йишварихь актар апIуз къарар адабгънийи. Думу актариз асас вуди, гьякъи уч апIруган, харжиди гъапIу ляхнихъан пул тутрувди гъибтуз хьибди.

Гьацира совещаниейиъ «Йиз Дагъустан» ва «Ерли тешкиллувалин ляхнар» проектариъ иштирак хьувалин месэлйирра за гъапIнийи.

Шагьрин администрацияйин экономикайин отделин начальник Самира Мягьямедовайи къайд гъапIганси, шагьрин жюрбежюр йишвар, объектар къайдайиз хувалин гьякьнаан агьалйирихьан теклифар февралин 15-пи йигъазкьан кьабул апIиди. Ерли тешкиллувалин ляхнарикан улхуруш, цIийи къайдйириинди, гьарсаб муниципалитетдин терефнаан 5 миллион манаттIан артухъ удудубчIвруси, шубуб проект кьабул апIиди. Гьаму йисан мектебар къайдайиз хпан ляхнар «100 мектеб» проектдин дахилнаъди гъахиди. Апрелин 15-пи йигъаз проектариин ляхин дапIну ккудубкIну, дурар тувну ккунду.