Мейлан Нежефов
Дадайин йигъ гьарсар касдин кIваз фици хуш вуш ва дидхьан фициб манишнан ялав гъюри аш, «дада» кIуру гьаму саб гафнан мянайи субут апIура.
Ихь уьлкейин вари шагьрар-районариъ машквраз тялукь вуйи серенжемар кIули гъухну. Чпин пишекарвалин рякъюъ заан дережайин хъуркьувалар улупурайи ва ватанпервервалин намуснан хатI кайи веледар тербияламиш апIурайи дадйириз гьюкуматдин жюрбежюр гъуллугъарихь хьайи регьбрарира кьимат тутрувди гъибтундар.
Гьаци, Ставрополь крайин Ставрополь шагьриъ кIули гъубшу серенжемдиъ хьурилан зиина веледар тербияламиш апIурайи бабар «Дадавалин медаль» тувбиинди, чухсагъул мялум апIбан кагъзиинди, кюкйирин кунцIариинди ва пулин конвертариинди лишанлу гъапIнийи.
Дурарин арайиъ ихь ватанагьли Зайнабат Нурудиновара айи. Зайнабат Шайибеговна Хив райондин Мажвгул гъулан агьали ву. Халис табасаран халачачи дишагьлийи чан уьмрин юлдаш Гьяжимевлюд Аьлескеровичдихъди йирхьур веледдикан (шубур байна шубур риш), намуслу тербия туври, баркаллу хизанарин эйсир ктаъну. Шубрид баярира кьягьялвалиинди гъи Украинайин жилариин гъябгъюрайи хусуси метлеб айи дявдин операцияйиъ гьунарар улупура. Ватанпервервалин рякъ кадабгънайи баяр гъи йицIбариинди медаларин, гьюрматнан ва чухсагъул мялум апIбан кагъзарин сагьибар ву.
«Дадайиз тувуб III дережайин медаль ву. Хъа улихьна йисари Дагъустандиъ II дережайинубра тувнайи. Ухьухь, медализ чан эйси гъидихъну, кIури шулу. Ав, гьарган хилар кьябар-кьуларихъ хамриъ, халачайихъ, кьябан кIулихъ шлу ва дусуз мажал адру дадайиз гьюкуматдин терефнаан гьамциб кьимат тувбиин шад вуза.
Бахтавар кас вуза ва узуз гьамцдар сагъу чвйир, чйир ва дурарин кьяляхъ гъира дюаь апIурайи адашна дада хъайивалин Аллагьдиз шюкюр апIураза. Гьамусра сар-сарихьан учу жара дарапIри, вари улин нинйирси рякъюри, рягьимлувалин рякъюъ учуси, гъи ич веледарра тIаърайи дурариз икрам апIураза.
Я Рабби, гьич сар абайизна бабаз балин дерд кьисмат дарибшри. Гъит гьарган дадйирин улар ухьуз аьлхъюри, хъа таза-тазади уржурайи уьли хилар аргури, ухьу жилиин разиди гъитри», – гъапнийи Зайнабат Нурудиновайин варитIан аьхюну риш Зинаидайи.
