Зубайдат Шябанова
Дадайин йигъан, вари Урусатдиъси, ихь республикайиъра, районариъра хайлин мажлисар тешкил гъапIнийи.
Му йигъан Дагъустандин дишагьлийирин советди ва Ватан уьбхрударин фондди хусуси метлеб айи дявдин операцияйиъ юкьур ва артухъ веледар иштирак шулайи ва думу женгариъ айи-адру сар велед кечмиш гъахьи бабариз Мягьячгъала шагьриз теклиф гъапIну. ИкибаштIан, Ватандин маракьар уьрхюри, Украинайин аьтрафариин 4-5 веледди сабишв’инди гъуллугъ гъабхурайи ва гьадушваъ айи-адру сар велед кечмиш гъахьи хизанар Табасаран райондиъра хайлин а. Райондин думу хизанарин дадйиризра теклифар гъафнийи.

Мажлисдин кьяляхъ узу думу бабар фужар вуш, серенжемдихьна дурар фици янашмиш гъахьнуш гьерхри, Табасаран райондин дишагьлийирин советдин кIулиъ айи Айханум Рашидовайихьна илтIикIунза.
«Серенжемдиъ Дагъустандин хайлин районариан дишагьлийир айи. Тешкилатчйири хъадапIнайи сиягьдик жара районариан 2, заан кIул шубур каш, Табасаран райондиан йирхьур дишагьли кайи. Дурарин гьисабнаъ ТIивак гъул’ан вуйи Эспет Ханмягьямедова ва Гюлбес Халикьова а. Эспет халайин хусуси метлеб айи операция гъябгъюрайи йишваъ юкьур бай ва шубур хтул, хъа Гюльбес халайин хьур бай а. Дагъни гъул’ан вуйи Калимат Аьбдуллаевайин – юкьур бай, НичIрас гъул’ан вуйи Инаят Адамовайин – юкьур бай, ТинитI гъул’ан вуйи Кисран Гьюсейновайин – юкьур бай, Акъа гъул’ан вуйи Угълангерек Гьяжиибрагьимовайин хьур бай ва сар хтул хусуси метлеб айи дявдин операцияйиъ а. Хъа Жарият Гьяжимурадовайин ва Кумсият Рамалдановайин думу дявдиъ ватандин маракьар уьрхюри айи-адру баяр гъийихну.
Мягьячгъалайиз гъюз теклифнан сиягьдик кайи бабарикан, хусуси метлеб айи дявдин операцияйиъ чан хванийин бай кечмиш духьну салам ади Эспет Ханмягьямедовайихьан ва жюрбежюр себебариан Кисран Гьюсейновайихьан гъюз гъабхьундайи.
Серенжемдиъ айи-адру сар бай хусуси метлеб айи операцияйиъ кечмиш гъахьи бабариз ва шубуртIан артухъ веледар сабишв’инди гьадушваъ айи бабариз Дагъустандин дишагьлийирин советдин терефнаан «Ватан уьбхюрайи эскрин бабаз аферин» медалар тувну.
Эскрарин бабарихъди гюрюшмиш хьпан серенжемдиъ Дагъустандин дишагьлийирин советдин кIулиъ айи Интизар Мамутаева, РД-йин милли политикайин министр Энрик Муслимов, РД-йин Халкьдин Собраниейин депутат Елена Павлюченко ва жарадар удучIвну гъулхну. Дурари ватанпервер баяр тербияламиш гъапIу бабариз чухсагъулин гафар гъапну ва дурарин игит эскрарин гьунарарикан ктибтну», – гъапнийи Айханум Рашидовайи.
Дадайин йигъаз бахш вуйи серенжемар республикайин меркездиъ хъа йигъанра давам шули имийи. Гьаци Мягьячгъала шагьриъ Дуствалин хулаъ Дагъустандин глава Сергей Меликовди хусуси метлеб айи операцияйиъ иштирак шулайи эскрарин бабариз ва Ватандин маракьар уьрхюрайидариз рягьимлувалин кюмек туврайи ватандашариз гьюкуматдин пешкешар тувну.
Пешкешар тувдарин арайиъ Табасаран райондин шубур дишагьлира айи. Сергей Меликовди Акъа гъул’ан вуйи Угълангерек Гьяжиибрагьимова Дагъустан Республикайин Гьюрматнан III дережайин орден, Дагъни гъул’ан вуйи Калимат Аьбдуллаева ва НичIрас гъул’ан вуйи Инаят Адамова Амет-Хан Султандин ччвурнахъ хъайи «Жигьилариз ватанпервер тербия тувбаз лигну» медаль тувбиинди лишанлу гъапIнийи.
Шиклиъ: (гаглихъван арчул терефназ) Калимат Аьбдуллаева (Дагъни гъул), Угълангерек Гьяжиибрягьимова (Акъа гъул) ва Инаят Адамова (Ничlрас гъул).