Нариз Гюлечова
27-пи ноябри Мягьячгъалайиъ Урусатдин экномикайин артмиш’валин министрин заместитель Сергей Назаровдин ва Дагъустандин Глава Сергей Меликовдин регьберваликкди республикайин туризмдин цирклиз, хъа асас вуди «Каспий гьюлин гъирагъдин кластер» проектдиз бахш дапIнайи заседание кIули гъубшну.

 

Заседаниейиъ асас вуди республикайин 4 райондин (Дербент, Къарабудагъкент, Гъяякент ва Мягьярамкент) сяргьятарихъди гъюрайи «Каспий гьюлин гъирагъдин кластер» туризмдин проектдин гьял дапIну ккуни месэлйирикан гъулхнийи. Гьадрарин арайиъ жилин, инфраструктурайин, транспортдин, шид зигбан ва жара месэлйирра айи.
Къайд дапIну ккундуки, 2030-пи йисаз му проектдин дахилнаъди гьаму 4 райондин сяргьятарихъди 14 агъзурна 500 дахъру йишвар айи, 7 агъзурна 200 нумрйир айи 28 гос-тиницйир ва общежитар тикмиш апIуз планламиш дапIна. Проектдиз удучIвурайи харжар 248 миллиард манатдин инвестицйир ву.

Заседаниейиъ Сергей Мели-ковди мялум гъапIганси, «Каспий гьюлин гъирагъдин кластер» проектдин дахилнаъди сатIиди 1500 бицIидар яшамиш хьуз йишвар айи «Дагъустан» кIуру Вариурусатдин бицIидарин центр тешкил апIуз кка. Думу проектдиз 6 миллиард манат харж хьибди.
Чан терефнаан Сергей Назаровди къайд гъапIганси, му центр тешкил апIуз дакьатар жара дапIна, аммаки, проект гьаму йисан аьхириз чарасуз гьязур дапIну ккунду. Гьацира дугъу, 2027-пи йисаз центр гьязур апIбан бадали, лазим вуйи вари инфраструктурайихъди тямин дапIну ккунибдикан гъапну.

Совещаниейиъ иштирак шулайи Дагъустандин туризмдинна халкьдин сяняаьткарваларин министр Эмин Мердановди туву мялуматниинди, гъийин йигъаз проектдиъ иштирак хьуз ккуни резидентар гъядягъна ва 57,6 миллиард манатдин 16 проектдиз правительственный комиссияйи ра-зивал тувна.
Гьацира, дугъу къайд гъапIганси, гьамусяаьтра Дербент райондиъ гостиничный инфраструктура артмиш апIуз ккундайи 9 резидентарихъди гафар-чIалар гъахура.
Каспий гъюлин гъирагъдихъди 6 километр манзил ади диврайи туристариз жюрбежюр рягьятвалар гъадагъру комплекс Урусатдиъ варитIан аьхюб хьибди.