Гюльнара Мягьямедова
Урусатдин статистикайин улупбариинди, 2024-пи йисан январин вазлин улупбарихь ттевиган, 2024-пи йисан сентябрин вазли кIамдин кьимат 17,96 процентдин за гъабхьну.

Гьелбетда, процент жигьатнаан гьисабар гъахури адаршра, кIамдин кьимат за дубхьнайивалиин агьалйир лап мюгьтал духьна. Белоруссияйиъ гьясил гъапIу 82% ччим ктубчIвру «Лизи хюни» кIамдин саб килойин кьимат 1450 манат, хъа гьадму уьлкейин 72% ччим ктубчIвру кило кIамдин кьимат 1150 манат дубхьна.

Урусатдин Федерацияйин гъулан мяишатдин министерствойин мялуматариинди, министерствойи уьлкейин рынок тухъ апIуз ва кIамдин кьиматар къайдайиз хуз, дуствалин уьлкйириан хурайи кIамдин кьадар артухъ апIбан рякъяр агура.
Урусатдиз Аьрабарин сатIи вуйи Эмиратариан (ОАЭ) никкдин хахнакан гъапIу кIаму хуз хъюгъна. Россельхознадзорин мялуматарин гъуллугъарин улупбариинди, 2-пи ноябриз ихь уьлкейиз 90 тонна сурсат дубхна.
Сабпи ражари Урусатдиз ОАЭ-йиан 2024-пи йисан 18-пи октябри хахнан кIаму гъабхну. Улихьна йисари Урусатдиз думу уьлкейиан кIаму хури гъабхьундайи.