Гюльнара Мягьямедова
Мягьячгъалайиъ 22-пи ноябриан 24-пи ноябризкьан волейболиан сабпи йишв бадали, республикайин турнир кIули гъушну. Республикайин меркездин 61-пи нумрайин мектебдиъ кIули гъушу талитариъ 2012–2013-пи йисари бабкан гъахьи баяр иштирак гъахьнийи. Сабпи йишв бадали вуйи талитариъ 6 команда иштирак гъахьну.

Талитариъ Табасаран райондин команда БутIлих райондиан вуйи командайиин 2:0 гьисабниинди, Гъяякент райондиан вуйи командайиин 2:0, «Мягьячгъала 1» командайиин 2:0 гьисабниинди гъалиб гъабхьну.
Финалин талитариъ Табасаран райондиан вуйи команда, «Мягьячгъала 2» командайиинра гъалибвал гъадабгъну, чпин яшанан таярин арайиъ Дагъустандиъ волейболиан сабпи йишваз удучIвну.
Волейболистариз кубокар, медалар ва дипломар тувну.

Талитар ккудукIбан кьяляхъ Табасаран райондин командайи спортдин артмиш’вализ гизаф фикир туврайивализ ва командайиз кюмек апIурайивализ дилигну, муниципалитетдин глава Мягьямед Къурбановдиз чухсагъул мялум гъапIнийи.
Лайикьлу гъалибвал гъадабгъбахъди Табасаран райондин команда, тренерар, спортдин мектебдин директор Садикь Уьсманов тебрик апIури, их спортсменариз хъана заан хъуркьувалар ккун апIурача.