Наргиз Гюлечова
Мягьячгъала шагьрин гъваларихъ хъайи Къумтургъала ва Новолак районарин ругариин «Росатом. Возобновляемая энергия» АО-йи Урусатдиъ варитIан аьхю, микIлиинди либхру электростанция (ВЭС) дивбан шибритIар ирчну. Му серенжемдиъ Урусатдин экономикайин артмиш’валин министрин заместитель Сергей Назаров, Дагъустандин глава Сергей Меликов, «Росатом. Возобновляемая энергия» АО-йин вакилар ва хъанара жара касар иштирак гъахьну.
Чан улхуб ккебгъри, Сергей Меликовди «Росатом. Возобновляемая энергия» АО-йиз Дагъустан республикайин яшайишдинна экономикайин артмиш’валик чпин пай кивбаз ва региондихъди сатIиди ляхин апIбаз чухсагъул мялум гъапIну.
«Гъи ухьу иштирак шулайи гьаму серенжемдин эвел гьар йисан кIули гъябгъюрайи Петербургдин форумарикан сабдиъ ккивуб ву. Уьлкейин экономикайин аьгьвалат читинуб вуйивализ дилигну, гьадмуган, гьамциб ляхин ккебгъурхьа кIури, гаф-чIал гъабхьнийи. Хъа 2022-пи йисан сатIиди ляхин апIбан бадали йикьрар йитIбан кьяляхъ, Новолакдин ВЭС-дин тикилишчивалин ляхнарихьна гьязур хьуз хъюгъну.
Пуз ккундузузки, электроэнергия артухъ апIбан бадали, Дагъустан Республика ужудар табиаьтдин шартIар ва девлетар айи регион ву. Республикайиъ электроэнергияйин циркил артмиш апIбан бадали, «Росатом. Возобновляемая энергия» АО-стар Урусатдин кIакIначи компанйирихъди Дагъустанди сатIиди гъахурайи проектари табиаьтдин мумкинвалар ишлетмиш апIури, жвуван агьалйир бадали гъайгъушнаъ айиб субут апIура», – гъапнийи Сергей Меликовди.
«Гъи юрутмиш апIуз хъюгънайи му проект гьаци ад бадали апIурайи инфраструктурайин проект дар. Думу инсанарин уьмриз хатIа кадру табиаьтдин девлетар ишлетмиш дапIну, агьалйирин яшайиш ужуб терефназди дигиш апIуз кIури, юрутмиш апIурайи проект ву.
Тикмиш апIуз хъюгънайи Новолакдин ВЭС 300 МВт кьувват айи электростанция хьибди, ва му микIлан электростанция ккудубкIуз 50 миллиардтIан артухъ инвестицйир ишлетмиш апIуз планламиш дапIна», – давам гъапIнийи чан улхуб Сергей Меликовди.
Къайд дапIну ккунду, Новолакдин ВЭС дивру жилариин электроэнергия тартиб апIру микIлахъди илтIикIру 120 алатар дивди ва йисандин арайиъ дурари яратмиш апIру электроэнергияйин кьадар 879 млн кВт.ч хьибди ва 240 агъзур хулар аквнахъди тямин апIиди.
«Росатом. Возобновляемая энергия» АО-йин тикилиш’валарин ляхнар тешкил апIру управлениейин начальник Олег Булаивскийин гафариинди, проект кьюб пайназ жара дапIна. Сабпи пай 152,5 МВт кьувват тувру 61 микIлахъди илтIикIру алатар дивну, 2025-пи йисан аьхириз ккудубкIиди, хъа кьюбпи пай кIуруш, 147,5 МВт кьувватнан гъузну имбуну 59 микIлахъди илтIикIру алатар дивну, 2026-пи йисан ккудубкIиди.
Серенжемдиз уч духьнайи улихь-кIулихь хьайи касари, тазади ккебгърайи ляхнин шибритI ипруган апIру аьдат гьархундар: Сергей Назаровди ва Сергей Меликовди чпин хилихъ хъайи сяътар шибритIиъ ирчну, микIлахъди либхру электростанцияйин тикилишчивалин ляхнар ккергъуз ихтияр тувну.
