29-пи ноябри Дагъустандин глава Сергей Меликовди, прямой эфириз удучIвну, республикайин агьалйирин суалариз жавабар тувди. Му жюрейин ляхин гьар йисан сабан кIули гъабхури, цци магьа 4-пи раж ву.
Пуб лазим вуки, агьалйириз региондин главайихьна вуйи суалар тувуз вахт ккимидитIан мумкинвал айи. Гъийин йигъаз региондин кIулиъ айирин адресназ хайлин суалар дуфна. Прямой эфирин тешкилатчйири колл-центриз главайихьна гъюрайи суалариз лигну варитIан гизафси гьял дапIну ккуни месэлйир гъядягъна. Дурарикан асасдар гизаф квартйир ккайи хуларин уртахъ гьяятар рас дапIну, къайдайиз хьпан, цIийи рякъяр ккивбан ва айидар рас апIбан, ягьалйирин яшайишдин гъайгъушнаъ хьпан ва дурариз кюмек апIбан месэлйир ву.
Кьадар жигьатнаан варитIан гизаф суалар Мягьячгъала, Каспийск ва Дербент шагьрарианна Дербент, Бабаюрт ва Буйнагъск районариан хъадаъна.

Сергей Меликовдиз суал тувбан бадали, горячий линияйин 8-8722-98-90-81 нумрайиз зенг апIуз, VoprosGIaveRD.ru портализ, кагъзикдиси, аудио ва видео жюрейииндира суалар хътIауз шулу. Гьацира республикайин агьалйириз «ВКонтакте» социалин сетьдиъ главайин страничкайизра суалар хътауз мумкинвал а.
29-пи ноябри хябяхъдин сяаьт хьубди Дагъустандин главайин прямой эфириз телевидениейин РГВК «Дагъустан», ГТРК «Дагъустан», «ННТ» каналариан ва гьацира Сергей Меликовдин чан ва «Дагъустан» РГВК-йин телеграм-каналариан лигай.
Мидланра савайи, «Дагълу уьлке», Мягьячгъалайиъ айи «Урусатдин радио», «Прибой», «Ватан» ва «Меркез» радиостанцйириан хъпехъуз шулу.