Наргиз Гюлечова

Контракт йибтIну, резервдин полкариъ гъуллугъ тамам апIурайи Дагъустандиан вуйи эскрариз саб ражари туврайи пулин кьадар 200 агъзур манатдин артухъ апIуз кка. Мидин гьякьнаан вуйи мялумат улихьна йигъари чарасуз вуди гьял дапIну ккуни месэлйириз бахш дапIнайи совещаниейиъ Дагъустандин глава Сергей Меликовди тувну.

Дугъан гафариинди, Урусатдин оборонайин министерствойихъди контракт йибтIурайидариз аьлавади туврайи 200 агъзур манат, контрактдикк къул гъизигу эскер резервдин полкнан гьисабназ гъадагъси, дишлади дугъан счетдихъна гъибди.

Къайд апIуб лазим вуки, хусуси метлеб айи дявдин операцияйиъ иштирак хьуз кIури, Урусатдин Яракьлу кьувватарин дахилнаъди резервдин полкар гьязур дапIна. Думу полкариъ, чпин хушниинди контракт йибтIну, хусуси метлеб айи дявдин операцияйиъ иштирак хьуз разивал тувнайи эскрар гьязур апIура. Резервдин полкариз гъадагънайи эскрар гьязур апIруган, асас фикир дурариз айи дяви гъабхбан ляхнарин тажрубайиз тувра.
Гьамусяаьт контракт гъийибтIу дагъустанлуйириз саб йишв’инди саб ражари 1 миллионтIан артухъ пул тувра. Гьадму гьисабнаъди 500 агъзур республикайин, 2024-пи йисан 1-пи августдихъан 31-пи декабризкьан контракт гъийибтIдариз 400 агъзур манат федеральный ва гьацира 300 агъзур манатдихьна муниципалитетарин бюджетариан тувра; вазлин маважибра 210 агъзур манат ву.
Мидланра гъайри, дицдар эскрариз ва дурарин хизанариз хайлин льготйирра а.