Гюльнара Мягьямедова

Табасаран райондин глава Мягьямед Къурбановдин ччвурнахъ Къазакарин мотострелковый 205-пи жаради вуйи бригадайин командованиейин кIулиъ айи командирин вазифйир тамам апIурайи подполковник А.Андрюшиндихьан Ватандин маракьар уьрхюрайи лайикьлу эскер, Хючна гъулан агьали Ильяс Шябанов тербияламиш апIбаз чухсагъул мялум апIурайи кагъаз гъафну.

 

Кагъзиъ къайд дапIнайиганси, ихь ватанагьлийиин вари уьлкейихьан дамагъ апIуз шулу.
«Гьюрматлу Мягьямед Сиражудинович! Казакарин мотострелковый 205-пи жаради вуйи бригадайин командованиейин терефнаан ичв ватанагьли Ильяс Шябанович Шябановдихъди гъуллугъ апIувал учуз аьхю гьюрмат вуйиваликан пуз ккундучуз.
Гъи, яракьра хилиъ ади, дугъу Украинайиъ миллетчивал терг апIбан бадали, гьюкуматди чан улихь дивнайи месэлйир тамам апIури, ислягь агьалйир, дишагьлийир, бицIидар ва кьабидар бандерайин миллетчйирихьан уьрхюра.
Дявдин гъуллугънан читинвалариз дилигди, ичв кюмекниинди, Ильяс Шябанов гьюкуматдин, чан хизандин, багахьлуйирин мюгькам даягъ вуди гъузра. Дугъу Урусатдин милли маракьар уьрхбаз чан вари кьувват сарф апIура.
Ичв ватангьлийин уьмрин рякъ гележегдин наслариз аку чешнеди улупуз шулу», – дупна чухсагъул мялум апIурайи кагъзиъ.

Ильяс Шябанов 2018-пи йисхъанмина, Урусатдин оборонайин министерствойихъди контракт йибтIну, военный гъуллугънаъ а. Думу Сирияйиъ гъахьи дявдин женгарин ветеран ву. Украинайиъ хусуси метлеб айи дявдин операция ккебгъу садпи йигъариланмина эскер Ильяс Шябановди Херсон областдиъ чпин бригадайин улихь дивнайи дявдин месэлйир намуслувалиинди тамам апIура.
Мягьямед Къурбановди къайд гъапIганси, ватанагьлийири гъуллугъ апIурайи частариан гьамцдар кагъзар кми-кмиди гъюрувалиин шад дархьиди гъузуз шулдар. Гьаму жюре кагъзар, веледариз ужуб тербия тувбаз чухсагъул мялум апIури, эскрарин абйир-бабарин адресназра гъюра.
Газатдин редакцияйин коллективдин терефнаан Ильяс Шябановдиз мюгькам сагъвал, душмнарин зиин гъалибвал гъадабгъну, чан хизандихьна кьяляхъ гъюб ккун апIурача.