Наргиз Гюлечова
Ццийин йис Хизандин йис вуйивализ лигну, уьлкейин гьарсаб пIипIнаъ дидиз тялукь вуйи жюрбежюр серенжемар гъахура. Йисандин натижйир йивру вахт дуфнашра, гьелелиг гизаф серенжемар гъахури ими.
Гьаму йигъари Табасаран халкьдин милли культурайин региондин автономияйи табасаран хизанарин арайиъ «Табасаран чIал уьбхюрайидар» ччвур тувнайи швнуб-саб пайнакан ибарат вуйи серенжем яркьуди тешкил дапIну гъабхура. Думу табсаранарин НКА-йин председатель Айваз Аьлихановдин жягьтлувалиинди табасаран хизанарин арайиъ гъабхуз тешкил дапIнайиб ву. Конкурсдин асас метлеб хизандиинди (адаш, дада, велед, вая адашна велед, ясана дадана велед) дуфну, конкурсдиъ иштирак хьуб ву. Душваъ табасаран чIалнан мялимдин хизандихьанра, мялимдихьан кIул’инди чахьанра ва гьацира чав дарс киврайи баяр-шубарихъдира иштирак хьуз шулу.
Му серенжемдиъ 8 номинацияйиан конкурсар кIули гъягъиди. Вари номинацйириъ 1-пи, 2-пи ва 3-пи йишвар гъадагъдариз пулин пешкешар тувди. Конкурсдин гъалибчйириз кIури, жара дапIнайи пулин уьмуми кьадар 350 агъзур манат ву.
Конкурсдин сабпи пай 30-пи ноябриъ Дербент шагьрин 8-пи нумрайин мектебдиъ му шагьрин ва Дербент райондин табасаран хизанарин арайиъ кIули гъубшну. Думу серенжемдиъ 187 хизандиан 400 кас иштирак гъахьну. Иштиракчйири конкурсдин дахилнаъди диктант гъибикIну ва гафар табасаран чIалнаан урус чIалназ ва урус чIалнаан табасаран чIалназ таржума гъапIну.
Гьаму жюрейиинди конкурс 11-пи декабриъ Дагъустандин Огни ва 14-пи декабриъ Мягьячгъала шагьрариъра кIули гъябгъиди. Конкурсдиъ иштирак хьуз ккуни хизанариз варидариз дициб мумкинвал а. Конкурсдин шараитариинди дина хизанариинди — адаш, дада, велед вая адашна велед, ясана дадана велед ва гьацира, зиихъ къайд гъапIганси, табасаран чIалнан мялимдин хизанра, гьацира мялимди ва чав дарс киврайи бай вая риш хъади дуфну ккунду.
Шубуб шагьриъ гъуху конкурсдин натижйир 21-пи декабри Дербент шагьриъ йивну, лайикьлу гъахьундариз пулин пешкешар тувди.
Серенжемдиз хусуси метлеб айи дявдин операцияйиъ иштирак шулайи Урусатдин Игатарин хизанариз, 50-тIан артухъ йисари сатIиди яшамиш шули, ва ужуб нумуналу хизандин аьдатар гъюрхдариз, СВО-йиъ шубуртIан артухъ веледар иштирак шулайи бабариз ва гизаф бицIидар айи хизанариз теклиф апIиди. Гьадму мяракайиъ конкурсдин гъалибчйирра мялум хьиди.
Яркьуди натижйир йивбан кьяляхъ му серенжемдикан социалин сетариъ ва газатдин машариъ аьхю макьала чап апIидича.
Гьюрматлу ватанагьлийир!
11-пи декабриъ Дагъустандин Огни шагьриъ, хъа 14-пи декабриъ Мягьячгъалайиъ кIули гъябгъру конкурсдин паяриъ иштирак хьуз учвуз теклиф апIурача.
