Зубайдат Шябанова

Гьаму йигъари Табасаран райондиъ Кьалухъ Мирзайин ччвурнахъ хъайи спортдин дараматдиъ волейболиан Дагъустандин Кубок бадали вуйи талитар кIули гъушну.

 

Талитар Дагъустандин волейболин федерацияйи ва Табасаран райондин администрацияйи тешкил гъапIнийи.
КIваин апIуз ккундучуз, му талитар 20 йисандин арайиъ дерккну, 2022-пи йисан цIийи кIул’ан гъахуз хъюгъдар ву. Ва дурар гьар йисан Табасаран райондиъ гъахури, цци шубубпи раж ву.

Райондиъ 2 йигъан гъахьи талитариъ республикайин варитIан ужудар 6 команда иштирак гъахьну. Дурар Табасаран, Хасавюрт, Хунзах районарин, Каспийск шагьрин, ДГУ-йин ва ДГТУ-йин спортсменарин командйир вуйи.
Турнирин эвелиъ командйир кьюб дестейиз жара гъапIну. Дурари плей-офф къайдайиинди чиб-чпин арайиъ талитар гъухну.
Сабпи полуфиналин талитариъ Табасаран райондин команда, ДГУ-йин студентариин 2:0 гьисаб ади гъалиб духьну, финализ удубчIвну. Гьадму гьисаб ади Хасавюртдин командара ДГТУ-йин спортсменариин гъалиб гъабхьнийи.

Финалин талитарин натижйириинди, Табасаран райондин команда Хасавюртдин волейболистарихьан магълуб гъабхьну. Хасавюрт райондин команда кубокдин сагьибар шули, цци шубубпи раж ву. Шубубпи йишв бадали талитназ удучIву вузарин командйирин арайиъ гъалибвал ДГУ-йин командайи гъадабгъну.
Турнирин аьхириъ гъалибчйириз ва пешкешнан йишвар гъадагъдариз кубокар, медалар, грамотйир ва пешкешар тувну.