Гюльнара Мягьямедова
Дагъустан Республикайин Кьумтургъала райондиъ ижми хъархъвас тартиб апIру, деврин тIалабариз гъилигу аьхю комплексдин саб пай тикмиш дапIну ккудубкIну. Думу республикайин ругариин диврайи йирхьуб объектдикан саб ву. Хъархъвас тартиб апIру объект 1,8 миллиард манатдин субсидйирин гьисабнаан тикмиш дапIна, ва дидин кьувват йисандин арайиъ 300 агъзур тонна ву. Вари 6 объект концессионный йикьрарин дахилнаъди тикмиш апIурайиб ву.
«2019-пи йисан вари уьлке ижми хъархъвас марцц апIбан цIийи къайдайихъна гъафиган, регионарин улихь ижми хъархъвас тартиб апIури, жилиъ иврайи хъархъвсин кьадар цIиб апIбан месэла улихь дийибгънийи. Амма Дагъустандиъ думу вахтназ хъархъвас дабхьру кьюб полигонтIан адайи. Багахь йисари думу полигонаринра мумкинвалар ккудукIурайи. Хъархъвсар тартиб апIру жара инфраструктура региондиъ адар. Республикайиъ цIийи инфраструктура арайиз хувалин сатIи ляхин 2021-пи йисан ккебгънийи. РФ-дин Правительствойин, Урусатдин табиаьтдин министерствойин, Республикайин экологияйин операторин кюмекниинди Дагъустандиъ ижми хъархъвас тартиб апIру 6 объект дивуз хъюгънийи. Кьумтургъала райондиъ диврайи полигон 2024-пи йисан аьхириз тикмиш дапIну ккудубкIнийи ва ишлетмиш’вализ ихтияр тувнийи. Къайд апIуб лазим вуки, республикайиъ арайиз хурайи деврин тIалабариз жаваб тувру му объектар гьамусяаьт кьувватнаъ айи къанундин къайдйириинди диврайидар ву. Дурари региондиъ айи табиаьтдин марццишнан аьгьвалат айибтIан ужи апIуз, хъархъвас тартиб апIбан ляхин дюзди апIуз мумкинвал тувди», – гъапну РЭО-йин директор Денис Буцаевди.
Къумтургъала райондиъ тазади тикмиш дапIнайи объект гьамусдин деврин заан технологйирин полигон ву. Думу 2022-пи йисан кьиматар багьа хьайиз гъадагънайи техникайихъди тямин дапIна.
Полигонди Къумтургъала райондин ЦIийи Урадайиан тартиб апIуз даршиди хъархъвас, ва гьацира Мягьячгъалайин зонайин тартиб апIбан кьяляхъ гъубзу хъархъвас кьабул апIиди.
«Вахтниинди ва заан ерийиинди чпин ляхин кIулиз адабгъу Республикайин экологияйин операториз жаради чухсагъул мялум апIуз ккундузуз. Йисан аьхириз ужуб хабар хъубкьу – Дагъустандиъ тикмиш апIурайи ТКО тартиб апIру 6 объектдикан саб тикмиш дапIну ккудубкIну. Дагъустанлуйир дапIнайи ляхнихьна, ихь шагьрарин ва районарин марццишнахьна жавабдарвалиинди янашмиш шул кIури, умуд кивраза», – гъапну Дагъустандин Глава Сергей Меликовди.
Къумтургъала райондиъ дивнайи полигон 2025-пи йисан дивну ккудубкIру зирзибил гъюдюбхру комплексдихъди сатIиди либхуз хъюбгъди.
2025-пи йисан зирзибил гъюдюбхру 3 комплекс ва кьюбсана полигон ишлетмиш’вализ тувди. Тикмиш апIурайи объектариз вуйи техникайин ва жара оборудованиейин аьхюну пай гъадабгъну, республикайиз дубхна.
