Мейлан Нежефов
Хив райондин администрацияйиъ райондин глава Ярмет Ярметовдин регьберваликкди 2024-пи йискан вуйи аьхиримжи совещание кIули гъубшну. Совещаниейиъ, йисандин арайиъ чпи гъубху ляхнин натижйир йивури, райондин гъуларин главйир, мектебарин директорар, бицIидарин багъарин заведующйир, жюрбежюр тешкилатарин, идарйирин ва карханйирин кIулиъ айидар, Юнармияйин, «Сарпидарин гьяракатнан» ва ТОКС-дин дестйирин вакилар иштирак гъахьнийи.
***
Вари Урусатдиъси, Хив райондиъра администрацияйин хянакк ЦIийи йисандин машквран гъаншариъ «Метлебарин ёлка» акция кIули гъябгъюра. Акцияйиъ асас вуди СВО-йиъ иштирак шулайи кьягьяларин веледар, бедендин шикаствал кайи бицIидар иштирак шула. Дурари чпин фикрар кайи кIажарикан уюнжагъар дапIну, ёлкайик китIна. Райондин гьякимари гьарури саб-кьюб уюнжагъ ктагъури, бицIидарин фикрар тамам апIури, дурар рази ктаура.
***
Мажвгларин кьялан мектебдиъра гъябгъюрайи мициб акция аьхирихъна гъюра. Мектебдиъ 111 урхурайир а. Хъа мектебарин администрацияйин гьарсаб хизандиан сар веледдин мурад тамам апIбан йикьрар гъапIнийи. Мектебдиз 67 хизандиан бицIидар гъюра. Администрацияйин акцияйиз пулиинди 42 агъзур манат пул уч гъабхьну. Дидихъ бицIидарин тIалабар бегьем апIуз хьиди ва 28-пи декабриъ пешкешар чпин эйсйирихьна рукьиди.
***
Хиварин кьялан мектебдиъ Украинайин жилариин гъябгъюрайи хусуси метлеб айи дявдин операцияйиъ жюрэтлувал улупури, Ватан бадали чпин ифи гьяйиф дарапIди, талаф гъахьи игит выпускникар Керим Идрисовдиз, Заур Идрисовдиз, Давид Рамазановдиз ва Амир Ремихановдиз бахш дапIнайи баннер кебхну. Му баннериъ аргъаж шулайи наслариз нумуна вуди, игитарин суратар ва уьмрикан вуйи мялуматар тувна.
***
1-пи октябрилан 31-пи декабризкьан ихь уьлкейиъ давам шулайи чвлин призыв райондиъ ужудар улупбариинди тамам гъабхьну. Мидкан Хив ва Агъул районарин дявдин комиссар Сулейман Гьюсейновди хабар тувра. «Райондиъ эскервалин буржи тамам апIуз чвлин призывдин сиягьариъ 34 кас улупнайи. Жара йишвариъси дарди, дурарихъ саб артухъ лицури, миннатар апIури, хъергуб алабхъундарчуз. Гьелбетда, мидик абйир-бабарин ва гъуларин главйиринра зегьмет ка. Жигьилари чпин эскервалин гъуллугъназ улупнайи уьмрин сад йис мянфяатлуди алдапIур кIури, умуд кивраза».
***
Хив райондиъ айи МВД-йин отделин гъарашугъари райондин гъуларин туканчйирихъди, главйирихъди ва гьацира мектебариъ урхурайи баяр-шубарихъди гъавриъ ахъру чIалниинди салютарин, петардйирин гьякьнаан вуйи сюгьбатар гъахура.
***
Хусуси метлеб айи дявдин операцияйиъ улупурайи гьунарариз лигну, ГъуштIил гъулан агьали, эскервалин частнан штабдин начальник, капитан Рафик Гьяжимирзоев, Асккан Яракк гъул`ан вуйи ефрейтор Арсен Мисриханов ва Лика гъулан бай рядовой Кюругъли Кюругълиев Жуковдин ччвурнахъ хъайи медалин сагьибар гъахьну.
***
СВО-йиан багъри Асккан Яраккна вахтназ вуйи отпускайиз дуфнайи кьюр чве, Асиф ва Акиф Рамазановар, райондин главайи администрацияйин терефнаан грамотйириинди лишанлу гъапIну. Хив гъулан агьали, полкнан командирин заместитель, майор Мурад Абумислимов «Дагъустандин Игит» медализ лайикьлу гъахьну.
***
Райондиз кьибла дагъустандиан дуфнайи гьюрматлу хялари – ВДВ-йин дявдин чвевалин председатель Мурад Керимовди, майор Ражидин Эмирбеговди ва аьхюну прапорщик Мягьямедкьасум Салигьовди – райондиъ Афгъандин ветеранарин советдин председатель Темирхан Агъабалаевдиз «Афгъанистандиъ гъуллугъ апIбаз» кIуру медаль тувну.
***
ГъуштIил гъулан агьали, табасаран халачачи Аьйшат Аьбдуллаевайиз, бабкан духьну 70 йисандин юбилей тебрик апIури, райондин главайи гьюрматнан кагъаз хътапIну. Аьйшат Амирхановнайин бай Мавзудин ва дугъан уьмрин юлдаш Радмила СВО-йиъ сабпи йигъланмина иштирак шула.
***
ДГПУ-йин ректор Нариман Асваровди, саки йицIуд йисан давам апIурайи аьдат, ццира кIулиз адабгъну – дугъу ЦIийи йисаз райондин бицIидарин багъариз меълишнарин пешкешар хътаъну.
Улубкьурайи 2025-пи йис бицIидарин гьамци меълишниинди гъарабхри!
