Гюльнара Мягьямедова
Советарин Союздин девриъ бицIидарин варитIан ккуни машквар ЦIийи йисандинуб вуйи. БицIидиган вахт лап явашди гъябгъруси рябкъюру, гьаддиз бицIидар машквраз лап ухдимиди ккилигури шуйи. Аьхирки, думу багахь шлуган, вари бицIидар цIийи йис кьабул апIуз гьязур шуйи.
1980-пи йисари ихь республикайин районариъ, гъулариъ кьюрдар аьхъюдар, кьамкьарихъди йифар айидарвуйи. Кьюрдун йигъан гвачIнинган чIатинди вуйи йифу ккапIнайи хулан раккин, ясана урар ачмиш апIуз шулдайи. ГвачIнинган сабпи ражари хул’ан удучIву касди, йифар гьадаури, рякъ ачмиш апIуйи.
Йиз бицIивахтна ЦIийи йисандин машквар мектебдиъ гъягъру гьязурлугваларихъди аьлакьалу вуйи. ЦIийи йис улубкьайиз саб-кьюб ваз ккимиди мектебдиъ урхурайидар музыкайин дарсар кивру мялимдихъди, гъулан культурайин хулан директорихъди сатIиди концерт улупуз гьязур шуйи. Ккергъбан классариъ урхурайидари ЦIийи йисаз бахш вуйи шиърар дургъуйи, хъа заан классариъ айидари мяълийир ва ялхъвнар гьязур апIуйи. Лоторея уйнамиш апIувал мяракайин варитIан ужуб пай вуйи. Билетар вахт ккимиди масу тувуйи ва уч гъабхьи пулихъ лотореяйиз удучIвру пешкешар гъадагъуйи. Гъулан культурайин хулаъ гъябгъру думу концертдиз вари гъуландар ккилигуйи.
Мектебдиъ тятIилар ккергъру йигъан цIийи йисандин концерт гъябгъруваликан мялумат тувуйи. Гъуландар, кьабидар-бицIидар вари, чпиз айи уччвударсдар ккуртар алахьну, культурайин хулан раккнарихъ, дурар ачмиш апIайиз ккилигури дийигъуйи. Хъа гьадму вахтна клубдин сягьнайиин мектебдин администрацияйи шагьриан дубхну дивнайи елка албагури шуйи. Ёлкайик китIру алатарра гьаму девринсдар, Китайдиъ гьязур дапIнайидар дайи. Дурар ихь гьюкуматдиъ марцци шюшейикан дапIнайидар, уткандар, гьарсаб игрушка йислан-йисаз уьбхюри, гъузнайидар вуйи. Аяз Абайизра гьаму девринсдар палтар адайи, дугъу аьхю ургам хъабхьри шуйи. Дугъахъ хъугърур, гьелбетда, фужкIара адайи. Думу ЦIийи йисандин машкквран лишанси гьисаб апIуйи.
Магьа клубдин раккнар ачмиш гъашиган, вари гъуландар клубдиз диш шуйи. Концерт ккебгъайиз шагьрариъ урхурайи студентарра кмиди гъулаз хъуркьуз чара апIуйи. Клубдиъ айи дусру йишвар варидариз гьуркIри шулдайи, гьаддиз гизафдари чпин хул’ан кусрийир хьади гъюйи. Клубдин ужагъдиъ вари дусну, сесер кам гъахьиган, мектебдин директори, сягьнайиина удучIвну, варидариз улубкьурайи цIийи йис мубарак апIуйи, гъюру йис гъябгъюрайи йистIан ужуб, хъуркьувалар айиб, ислягьуб хьувал ккун апIуйи. Тебрикнан кьяляхъ мектебдиъ урхурайидари ва гъулан культурайин хулан гъуллугъчйири гьязур дапIнайи концерт ккебгъуйи. Концертдин гьар номерин кьяляхъ мектебдиз гъягъру вахт дубхьну адру сар бицIири лотореяйин билетар адагъуйи. КIваин илмийиз, саб ражари ич гъуншдин билетдиз чIиви датт удубчIвнийи, тмунуриз тIулан мургул, ва гьамци хайлин тамашайин алатар.
Лап бицIидариз сабсан тамши гьязур апIуйи. Дизигну тIурин, гьаддикк гъидиржнайи пешкешар ккитIуйи. Хъа бицIирин улариин ягълухъ илибтIну, гьадму ккерхнайи пешкешарин терефназ гьауйи. БицIири фунуб пешкеш гъибисиш, думу гьадму пешкешнан эйси шуйи.
ЦIийи йисандин концертра гьамци шаддикIули гъябгъюйи. Думу ккудубкIбан кьяляхъ вари гъуландар чпин хулариз алдагъуйи, ицци хурагар гьязур дапIну, чпихьна дуфнайи хялариз гьивуйи; гъуншйир сар-сарихьна гъягъюри, шадди вахт адапIуйи. Гьамциб аьдатниинди вари гьюкуматдин машкврарра, диндин машкврарра къайд апIури, гъуланагьалйири шадууьмур хъапIуйи. Думугандин шадвал гьамус имдар. Гъийин деврин тIалабар жарадар ву.
